Роҳбари Роспотребнадзор хостори таъсиси «сипари умумии санитарӣ» бо кишварҳои ИДМ шуд

ДУШАНБЕ, 03.02.2022 /АМИТ «Ховар»/. «Сипари санитарӣ» мебояд бо кишварҳои ИДМ ба таври муштарак бошад, зеро фазо ва  тадбирҳои  мубориза бо сироятҳо умумӣ мебошанд. Тавре АМИТ «Ховар» хабар медиҳад, дар ин бора дирӯз Раиси «Роспотребнадзор» Анна Попова дар мусоҳиба бо РИА «Новости» изҳори назар намудааст.

«Фазо умумӣ аст ва тадбирҳоямон низ муштарак мебошанд. Албатта, «сипар» имрӯз бояд умумибашарӣ бошад. Мо аз Президенти Федератсияи Русия дастур гирифтем, ки бо ҳамтоёнамон дар кишварҳои Иттиҳоди Давлатҳои Мустақил ҳамкорӣ намоем, то ба онҳо дар барқарор кардани пойгоҳи собиқ, вале гумшудаи тадқиқотӣ оид ба кор бо микроорганизмҳои дараҷаи хатарнокиашон баланд кумак расонем»,-гуфт Попова.

Ӯ зикр намуд, ки сатҳи хеле баланди иртибот ва муҳоҷират миёни кишварҳои Иттиҳоди иқтисодии Авруосиё аз он дарак медиҳад, ки фазои эпидемиявӣ як аст ва бояд дар мубориза бо сироятҳо равишҳои муштарак вуҷуд дошта бошанд.

Тавре АМИТ «Ховар» қаблан хабар дода буд, охири соли сипаригардида Анна Попова бо сафари корӣ ба Точикистон омад. Попова 17 декабри соли 2021 дар Душанбе бо Сарвазири Тоҷикистон Қоҳир Расулзода ва Вазири тандурустӣ ва ҳифзи иҷтимоии аҳолӣ Ҷамолиддин Абдуллозода мулоқот намуда буд.

Зимни ин вохӯриҳо ба роҳандозии ҳамкории судманд миёни Тоҷикистон ва Федератсияи Русия таваҷҷуҳ зоҳир гардида, оид ба таҳкими ҳамкории Ҷумҳурии Тоҷикистон ва Хадамоти федеролии ҳифзи ҳуқуқи истеъмолкунандагон ва некӯаҳволии инсони Федератсияи Русия андешаҳои судманд иброз гардиданд.

АКС: РИА «Новости/АМИТ «Ховар»