СҶТ: Анҷоми пандемия метавонад то охири соли 2022 эълон шавад

ДУШАНБЕ, 22.02.2022 /АМИТ «Ховар»/. Пандемияи коронавирус метавонад имсол ба охир расад, эҳтимол дорад, ки пас аз мавҷи омикронӣ дар ҷаҳон хуруҷи зиёди сироятҳо ба амал наояд. Дар ин бора дар мусоҳиба бо ТАСС намояндаи махсуси Созмони Ҷаҳонии Тандурустӣ (СҶТ) дар Русия Мелита Вуйнович изҳори назар намуд.

«Ҳоло пешгӯӣ кардан душвор аст, аммо мо умедворем, ки агар ҳеҷ чизи дигар рӯй надиҳад, пас пандемия метавонад соли 2022 хотима ёбад»,- гуфт ӯ. Анҷоми пандемия чӣ маъно дорад? Ин маънои онро дорад, ки ҳолатҳои калон ошкор рух намедиҳанд, аммо ин маънои онро надорад, ки вирус нест мешавад. Шумораи зиёди сироятшудагон нишонаи он аст, ки вирус қобилияти тағйир ёфтан дорад, бинобар ин мо намедонем, ки вазъ чӣ гуна инкишоф меёбад. Аммо хушбинии эҳтиёткоронае вуҷуд дорад, ки авҷҳои бузург баъди  саросари ҷаҳонро давр задани омикрон хотима меёбанд”.

Ба гуфтаи Вуйнович, СҶТ кӯшиш мекунад пешгуӣ кунад, ки ин ҳолат кай рух медиҳад, аммо дар ин кор мушкилот ба миён меоянд, зеро ҳукуматҳо ҳоло стратегияҳои санҷишии худро тағйир медиҳанд. Ҳамин тавр, вай тавзеҳ дод, ки штамми омикрон хеле сирояткунанда буда, зуд паҳн мешавад ва баъзе кишварҳо бо назардошти шумораи зиёди сироятҳои асимптоматикӣ барои санҷиши ҳамаи одамон имконияти молиявӣ ва ғайра надоранд. «Ҳолате, ки мо ҳоло мебинем, шумораи дақиқи сироятёфтагонро пурра инъикос намекунад, чуноне ки дар оғози пандемия ва дар ҳолати штамми делта буд», — хулоса кард намояндаи СҶТ.

Мелита Вуйнович гуфт, ки штамми омикронии коронавирус метавонад ҷараёни шадиди бемориро ба вуҷуд орад, аз ин рӯ аҳолии осебпазир бояд эм карда шаванд. «Фарогирии гурӯҳҳои осебпазири аҳолӣ бо ваксинаҳо муҳим аст. Инҳо одамони синнашон аз 60 ё 65 боло, аҳолии гирифтори бемориҳои музмин ва дигар бемориҳоеанд, ки ҳамзамон бо омикрон дар шакли шадид зуҳур кардаанд”, — иброз дошт ӯ.

Намояндаи махсуси СҶТ хотиррасон кард, ки дар омикрон нисбат ба штамми делта ҳолатҳои вазнин камтар рух медиҳанд, аммо ин маънои онро надорад, ки онҳо вуҷуд надоранд. “Ин маънои онро надорад, ки одамон наметавонанд ба таври ҷиддӣ бемор шаванд ва ҳатто бимиранд»-гуфт Мелита Вуйнович. Ба гуфтаи вай, афроди ваксинашуда нисбат ба онҳое, ки ваксина нагирифтаанд, хеле камтар бемор мешаванд.

АКС аз манбаъҳои боз