Дар Душанбе тавсеаи ҳамкории мақомоти гумруки Тоҷикистон бо Барномаи USAID баррасӣ шуд
ДУШАНБЕ, 18.03.2022 /АМИТ «Ховар»/. Ҳолати кунунӣ ва дурнамои ҳамкории мутақобилан судманд миёни мақомоти гумруки Тоҷикистон ва Барномаи USAID оид ба савдо дар Осиёи Марказӣ дар мулоқоти муовини якуми сардори Хадамоти гумруки назди Ҳукумати ҷумҳурӣ Азим Турсунзода бо роҳбари Департамент оид ба рушди иқтисоди USAID дар Ҷумҳурии Тоҷикистон Уиллиям Хол дар Душанбе баррасӣ гардид, иттилоъ доданд ба АМИТ «Ховар» дар Хадамоти гумруки назди Ҳукумати ҷумҳурӣ.
Мусоҳибон ҳамзамон доир ба дурнамои Барномаи USAID оид ба савдо дар Осиёи Марказӣ, ки муддати панҷ соли оянда фаъолият хоҳад кард, шинос шуданд.
Азим Турсунзода зикр намуд, ки бо дарназардошти ҳолати имрӯзаи кишвари ҳамҷавор бо Тоҷикистон ва ҳадафу мақсадҳои барномаи мазкур моро зарур аст дар ҳамкорӣ бо шарикони рушд сарҳади тӯлонии кишварамонро бо таҷҳизоту лавозимоти муосир ва ҳайати шахсиро бо доир намудани семинару тренингҳои омӯзишӣ бо таҷрибаи пешқадам оид ба пешгирӣ аз ҳар гуна зуҳуроти номатлуб, ки барои тамоми кишварҳои минтақа ва ҷаҳон хавф эҷод менамояд, таъмин намоем.
Хадамоти гумрук миёни дигар мақомот дар рақамикунонии пешбурди фаъолияти гумрукӣ мавқеи намоён дошта, минбаъд низ дар ҳамкорӣ бо шарикони рушд барои расидан ба ҳадафҳое, ки дар Барномаи миёнамуҳлати рушди мақомоти гумруки Ҷумҳурии Тоҷикистон барои солҳои 2020-2024 иъикос гардидаанд, тадбирҳои зарурӣ меандешад.
Бояд тазаккур дод, ки Барномаи USAID оид ба савдо дар Осиёи Марказӣ дар кишварҳои Қазоқистон, Қирғизистон, Тоҷикистон, Туркманистон ва Узбекистон амалӣ хоҳад гардид. Кӯшишҳо оид ба рушди тиҷорат дар доираи барномаи нав ба таҷрибаи деринаи USAID дар мусоидат ба савдои минтақавӣ, рушди соҳибкорӣ ва робитаи минтақавӣ такя хоҳанд кард.
Ҳадафи барнома ба беҳтар намудани ҳамкории тиҷоратӣ дар минтақа барои мусоидат ба рушди иқтисодӣ ва имконияти иқтисодӣ дар Осиёи Марказӣ тавассути ҳамоҳангсозии расмиёти гумрукӣ ва назорати сарҳадӣ, таҳкими ҳамкорӣ миёни давлатҳо ва бахши хусусӣ дар соҳаи тиҷорат ва сармоягузорӣ, рушди ботадриҷи ҳамкории байнисарҳадии тиҷорат миёни кишварҳо ва инчунин масъалаҳои гендерӣ дар савдо нигаронида шудааст.
Мусоҳибон инчунин оид ба дарёфти роҳҳои нави ҳамкорӣ табодули назар намуданд.
АКСҲО: Хадамоти гумруки назди Ҳукумати ҶТ
Дар Барселона имконоти сармоягузории Тоҷикистон муаррифӣ гардид
СОҲИБКОРӢ ҲАМ МАСЪУЛИЯТ МЕХОҲАД! Аз ҷониби кормандони Кумитаи бехатарии озуқаворӣ маҳсулоти гӯштии бесифат мусодира карда шуд
Фармони Президенти Ҷумҳурии Тоҷикистон «Дар бораи танзими музди меҳнат ва пардохти иловапулӣ ба музди меҳнати кормандони соҳаи технологияҳои иттилоотию коммуникатсионӣ» ба имзо расид
Муқовимат ба коррупсия омили муҳими рушди устувори Тоҷикистон аст
Дар Тоҷикистон 556,5 гектар боғҳои нав бунёд карда шуданд
ЗЕҲНИ СУНЪӢ ЧИСТ? Ва ё мошинҳои ҳисоббарор метавонанд ба монанди инсон фикр карда, қарор қабул намоянд?
Муҳлати лоиҳаи содагардонии расмиёти савдо дар Осиёи Марказӣ то соли 2029 тамдид карда шуд
Тоҷикистон ва Қирғизистон ҳамкориро дар соҳаи инноватсия ва технологияҳои рақамӣ тақвият медиҳанд
Намояндагони Тоҷикистон дар Форуми байналмилалӣ оид ба таҳкими ҳамкорӣ дар самти мубориза бо маводи мухаддир ва ҷинояткорӣ иштирок намуданд
Дар Душанбе Форуми 10-уми Осиёи Марказӣ оид ба идоракунии интернет – CAIGF 2026 баргузор шуд
Дар Душанбе нахустин конфронси байналмилалӣ оид ба мониторинг ва арзёбӣ баргузор шуд
Табодули мол байни Тоҷикистон ва давлатҳои иштирокчии Барномаи махсуси СММ барои иқтисодиёти Осиёи Марказӣ ба 2,1 миллиард доллар расид
