Миёни Вазорати кишоварзии Тоҷикистон ва Донишгоҳи давлатии аграрии Иркутски Русия Ёддошти ҳамкорӣ ба имзо расид

ДУШАНБЕ, 29.03.2022 /АМИТ «Ховар»/. 28 март миёни Вазорати кишоварзии Ҷумҳурии Тоҷикистон ва Донишгоҳи давлатии аграрии Иркутски Русия ба номи А.А. Ежевский барои омода намудани мутахассисон дар соҳаи кишоварзӣ Ёддошти ҳамкорӣ ба имзо расонида шуд, иттилоъ доданд ба АМИТ «Ховар» дар шуъбаи матбуот ва иттилооти Вазорати кишоварзии мамлакат.

Дар асоси Ёддошти мазкур, довталабон аз Ҷумҳурии Тоҷикистон метавонанд дар Донишгоҳи давлатии аграрии Иркутск ройгон таҳсил намуда, ҳамзамон аз имтиёзҳои гуногун, аз ҷумла, хобгоҳ ва идрорпулӣ бархурдор шаванд.

Ёддошти ҳамкорӣ бо иштироки Вазири кишоварзӣ Саъдӣ Каримзода, ректори Донишгоҳи аграрии Тоҷикистон Усмон Маҳмадёрзода, ноиби президенти Академияи илмҳои кишоварзӣ Файзулло Амиршоев ва намояндагони Донишгоҳи давлатии аграрии Иркутск ба имзо расонида шуд.

АКС: Вазорати кишоварзии ҶТ