Музаффар Ашӯриён: «Тоҷикистон чун ҳамсояи наздик ҳамеша аз ҳалли фарогир ва мусолиматомези мушкилоти Афғонистон ҷонибдорӣ кардааст»

Март 31, 2022 15:41

ДУШАНБЕ, 31.03.2022 /АМИТ «Ховар»/. Имрӯз, 31 март дар шаҳри Тунсии Ҷумҳурии Мардумии Чин нишасти сеюми вазирони ҳамсоякишварҳои Афғонистон баргузор шуд, ки дар он ҳайати Ҷумҳурии Тоҷикистон таҳти роҳбарии Вазири адлия Музаффар Ашӯриён ширкат намуд. Дар ин бора АМИТ «Ховар» бо истинод ба Вазорати корҳои хориҷии Тоҷикистон хабар медиҳад.

Роҳбари ҳайати Тоҷикистон зимни суханронӣ манфиатҳои муштаракро ба барқароршавии Афғонистон ҳамчун давлати аз нигоҳи сиёсӣ устувор, сулҳҷӯ ва рушдёбанда, ки ба ҳуқуқу озодиҳои бунёдии инсон эҳтиром гузошта, аз терроризм ва ҷиноятҳои маводи мухаддир бошад, зикр кард.

Ҷониби Тоҷикистон изҳори итминон кард, ки мардуми Афғонистон бо тамоми гуногунии этникӣ, сиёсӣ ва иҷтимоӣ бояд дар муайян кардани ояндаи кишвари худ ҷалб карда шавад.

«Ташаккули ҳукумати ҳамашумул тавассути интихобот ва бо иштироки тамоми гурӯҳҳои сиёсӣ, этникӣ ва иҷтимоӣ, инчунин таъмини ҳуқуқи инсон шарти бунёдии ба эътидол овардани вазъият ва ҳалли мушкилоти амниятӣ дар Афғонистон мебошад. Тоҷикистон чун ҳамсояи наздик ҳамеша аз ҳалли фарогир ва мусолиматомези мушкилоти Афғонистон ҷоибдорӣ кардааст», — афзуд роҳбари ҳайати Тоҷикистон.

Ҳамчунин гуфта шуд, ки Тоҷикистон борҳо зарурати ироаи кумакҳои башардӯстонаи ҳамаҷониба ба мардуми азияткашидаи Афғонистонро аз ҷониби ҷомеаи ҷаҳонӣ таъкид кардааст.

Дар ин робита зикр гардид, ки Ҷумҳурии Тоҷикистон имконоти логистикии худ, аз ҷумла шаш пул дар марз бо Афғонистонро барои интиқоли борҳои башардӯстона аз ҷониби созмонҳои байналмилалӣ ба Афғонистон фароҳам оварда, илова бар ин, интиқоли неруи барқро ба ин кишвар идома медиҳад.

«Мо омодаем минбаъд низ ба ин раванд ҳамаҷониба мусоидат намоем, то заминаҳои зарурӣ барои истиқрори сулҳу субот, амният ва эҳёи иҷтимоию иқтисодии онро дар сарзамини азияткашидаи Афғонистон фароҳам оварем», — илова намуд М.Ашӯриён.

Дар фарҷом Изҳороти муштараки нишасти сеюми вазирони корҳои хориҷии ҳамсоякишварҳои Афғонистон ва Ташаббуси Тунси барои дастгирии эҳёи иқтисод дар Афғонистон қабул шуданд.

Дар Изҳороти муштарак дар баробари пешниҳодҳои дигари Тоҷикистон ташаббуси Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати таъсиси «камарбанди амниятӣ» дар атрофи Афғонистон дарҷ гардид.

Пас аз нишаст мулоқоти дуҷонибаи М. Ашӯриён бо Вазири корҳои хориҷии Ҷумҳурии Мардумии Чин Ван И баргузор шуд, ки дар рафти он масъалаҳои муносибатҳои шарикии стратегии ҳамаҷонибаи Тоҷикистону Чин мавриди баррасӣ қарор гирифтанд.

АКСҲО аз манбаъҳои боз

Март 31, 2022 15:41

Хабарҳои дигари ин бахш

Дар Душанбе дурнамои ҳамкории Тоҷикистон ва Қазоқистон баррасӣ карда шуд
Санадҳои ниҳоии Конфронси байналмилалии сатҳи баланд оид ба ҳифзи пиряхҳо интишор гардиданд
Дар Москва Парчами давлатии Тоҷикистон ба ифтихори 34-солагии Истиқлолият намоиш дода мешавад
Бо ташаббуси Тоҷикистон Қатъномаи нави СММ оид ба ҳамкорӣ бо ИДМ қабул гардид
Тоҷикистон ва Эрон ҳамкориро дар соҳаи китобдорӣ ва фарҳанг густариш медиҳанд
Тоҷикистон ва Ҷопон масъалаҳои муҳими ҳамкориро баррасӣ намуданд
Дар Душанбе дурнамои равобити Тоҷикистон ва Иттиҳоди Аврупо баррасӣ гардид
9 сентябр шаршараи Ниагара бо рангҳои Парчами давлатии Ҷумҳурии Тоҷикистон фурӯзон хоҳад шуд
Ҳамкории судманди Тоҷикистон ва сохторҳои Созмони Милали Муттаҳид баррасӣ карда шуд
Дар Женева самтҳои муҳими ҳамкории Тоҷикистон бо UNHCR баррасӣ карда шуданд
Байни ҳукуматҳои Тоҷикистон ва Ҷопон доир ба лоиҳаи «JDS» Ёддоштҳои табодулӣ ба имзо расиданд
Дурнамои рушди муносибатҳои минтақаҳои Тоҷикистон ва минтақаи Приморски Русия дар бахшҳои гуногун баррасӣ шуд