22,3 фоизи қарзҳои ба муштариён пешниҳоднамудаи «Амонатбонк» ба соҳаи саноат рост меояд

ДУШАНБЕ, 19.04.2022 /АМИТ «Ховар»/. Бонки давлатии амонатгузории Ҷумҳурии Тоҷикистон  «Амонатбонк»  дар се моҳи соли равон  аз ҳисоби захираҳои дохилию хориҷӣ ба зиёда аз 16 ҳазор муштарӣ 342 миллион сомонӣ маблағҳои қарзӣ пешниҳод намудааст, ки беш аз 22  фоизи он ба соҳаи саноат рост меояд, иттилоъ медиҳад АМИТ «Ховар» бо истинод ба Бонки  давлатии  амонатгузории Ҷумҳурии Тоҷикистон «Амонатбонк».

Қарзҳои мазкур дар иртибот ба Солҳои рушди саноат эълон гардидани солҳои 2022–2026 дар Тоҷикистон   ва аҳамияти бузурги соҳаи саноат дар рушди минбаъдаи иқтисоди мамлакат дода шудаанд.

Ҳаҷми қарздиҳӣ нисбат ба ҳамин давраи соли гузашта қариб 44 фоиз зиёд  зиёд гардидааст. Аз қарзҳои додаи «Амонатбонк» ба муштариён 22,3 фоиз ба соҳаи саноат, 27,3 фоиз ба кишоварзӣ,  28,3 фоиз ба соҳаи истеъмолӣ, 3 фоиз ба сохтмон, қариб 18 фоиз ба тиҷорат, 0,4 фоиз ба соҳаи нақлиёт  ва 0,8 фоиз ба соҳаҳои хизматрасонӣ -сайёҳӣ, тандурустӣ ва хӯроки умумӣ рост меояд.

«Амонатбонк» барои гузоштани саҳми назаррас дар низоми бонкӣ дар 5 соли оянда тавассути пешниҳоди қарзҳои дастрасу дарозмуддат, инчунин дар самти ҳамасола зиёд намудани ҳиссаи қарздиҳӣ ва дар ин замина мусоидат ба таъсиси ҷойҳои нави кории доимию мавсимӣ тадбирҳои зарурӣ меандешад.

АКС: аз манбаъҳои боз.