Бахшида ба «Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф» конференсия доир гардид

Апрель 20, 2022 09:55

ДУШАНБЕ, 20.04.2022. /АМИТ «Ховар»/. 19 апрел дар Донишгоҳи давлатии Бохтар ба номи Носири Хусрав бахшида ба «Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф» конференсияи илмию назариявии устодону донишҷӯён баргузор шуд, хабар доданд ба АМИТ «Ховар» дар маркази таҳлилӣ-иттилоотии донишгоҳ.

Ректори донишгоҳ Сайфиддин Давлатзода иброз дошт, ки Донишгоҳи давлатии Бохтар дар радифи дигар муассисаҳои таҳсилоти олии мамлакат дар самти тайёр намудани мутахассисони соҳаҳои омӯзгорӣ ва бахшҳои дигари хоҷагии халқи вилояти Хатлон ва мамлакат нақши муҳим мегузорад.

«Танҳо дар се моҳи аввали соли 2022 дар донишгоҳ 623 нафар устодони доимӣ, аз ҷумла 19 нафар докторони илм, профессорон, 145 нафар номзадҳои илм ва дотсентон, 459 нафар саромӯзгорон, омӯзгорон ва ассистентон дар 45 кафедраи донишгоҳ муттаҳид шуда, ба корҳои илмию таҳқиқотӣ ва илмию методӣ машғул шуданд. Корҳои илмию таҳқиқотӣ дар донишгоҳ аз рӯйи 45 равия сурат гирифта, зиёда аз 70 мавзӯъро дар бар мегиранд»,- афзуд Сайфиддин Давлатзода.

Дар конференсия доктори илмҳои педагогӣ Абдурасул Сатторов дар мавзӯи «Баъзе масъалаҳои мубрами таълими математика», доктори илмҳои педагогӣ Санг Холназаров дар мавзӯи «Тайёрии илмӣ-методии омӯзгорон ҳамчун субъекти муҳими таълиму тарбия», доктори илмҳои техникӣ Ҷурабой Собиров дар мавзӯи «Таъсири барандагон ва ҳарорат ба хосиятҳои гармофизикии сегнетоэлектрикҳо-нимноқилҳо дар атрофи нуқтаи Кюрӣ» ва доктори илмҳои педагогӣ Баҳрулло Файзализода дар мавзӯи «Хусусияти ҳамгироёнаи технологияҳои иттилоотию коммуникатсионӣ бо системаи маориф» маърӯза намуданд.

Зикр шуд, ки дар донишгоҳ барои ба илмҳои дақиқ  фаро гирифтани донишҷӯён барномаҳо амалӣ мегарданд.

Ёдовар мешавем, ки бо фармони Президенти Ҷумҳурии Тоҷикистон солҳои 2020-2040 Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф эълон шудаанд. Фармон 31 январи соли 2020 ба имзо расида буд.

Моҳи марти соли 2020 Сарвари давлат зимни мулоқот бо олимони мамлакат гуфта буданд: «Имрӯз бе илму инноватсия, технологияҳои иттилоотиву коммуникатсионӣ ва ташаккули ҷаҳонбинии техникӣ қадаме ба пеш гузошта намешавад. Аз ин рӯ, мо рушди илмҳои муосир, махсусан дақиқро ба мадди аввал гузоштем, зеро дар назди мо боз як вазифаи бузург, яъне ҳадафи чоруми стратегӣ– саноатикунонии босуръати кишвар қарор дорад».

Ба гуфтаи Сарвари давлат, бо ин мақсад истифодаи технологияҳои муосир дар тамоми соҳаҳои иқтисоди миллӣ густариш ёфта, тафаккури техникии аҳолӣ, дар навбати аввал, ҷавонон тақвият дода шуда, барои пешрафти илмҳои бунёдӣ ва техникиву технологӣ фазои мусоид фароҳам оварда шавад.

АКСҲО: ДДБ ба номи Носири Хусрав

 

Апрель 20, 2022 09:55

Хабарҳои дигари ин бахш

Шумо барои фарзандатон дар таътили тобистона реҷаи рӯз тартиб додаед?
МАСЛИҲАТ БА ДОВТАЛАБ. Барои дар ёфтани маркази имтиҳонӣ ба мушкил дучор нагардидан чӣ бояд кард?
1 июл даври асосии Имтиҳонҳои марказонидаи дохилшавӣ оғоз мегардад
Барои иштирок дар даври асосии Имтиҳонҳои марказонидаи дохилшавӣ беш аз 112 ҳазор нафар довталаб номнавис карда шуд
Аҳлиддин Ибодуллозода: «Тарбияи насли нави ваҳдатофару ваҳдатсаро аз омӯзгорон – меъморони руҳи инсон вобаста аст»
«БЕҲТАРИН ОМӮЗГОР». Фотима Сайдализода дар Озмуни байналмилалии таҳқиқотӣ сазовори дипломи дараҷаи I гардид
Марҳалаи якуми озмуни довталабон барои дарёфти Стипендияи байналмилалии «Дурахшандагон» доир гардид
Байни Донишгоҳи давлатии Бохтар ва Донишгоҳи забонҳои хориҷии Сиани Чин Ёддошти тафоҳум ба имзо расид
Ҳамкорӣ байни муассисаҳои таҳсилоти олии Тоҷикистон ва Узбекистон таҳким меёбад
Дар шаҳри Хуҷанд ғолибони олипиадаҳо ва омӯзгорони беҳтарин қадршиносӣ шуданд
Донишгоҳи давлатии ҳуқуқ, бизнес ва сиёсати Тоҷикистон бо Донишгоҳи давлатии забонҳои хориҷии Сиани Чин лоиҳаҳои инноватсиониро амалӣ менамоянд
Устодони Донишгоҳи техникии Тоҷикистон дар Форуми табодули истеъдодҳои Осиёи Марказӣ иштирок доранд