Дар барномаи «Сарват»-и Радиои «Ховар» ду Даҳсолаи байналмилалии амали марбут ба об шарҳ дода мешаванд

Апрель 11, 2022 09:15

ДУШАНБЕ, 11.04.2022 /АМИТ «Ховар»/. Ҷумҳурии Тоҷикистон  яке аз мамлакатҳое ба ҳисоб меравад, ки дорои захираҳои зиёди об буда, ҳамасола дар ҳудуди он 64 млрд м³ об ҳосил мешавад, ки 60% — и оби ҳавзаи баҳри Аралро ташкил медиҳад. Тибқи маълумоти мутахассисони соҳа, Тоҷикистон аз рўйи бузургии ҳаҷми захираҳои гидроэнергетикӣ дар ҷаҳон ҷойи 8 – ум ва аз рўйи ҳаҷми қиёсии захираҳо (ба ҳар сари аҳолӣ ва ба ҳар 1 км ҳудуд) мутаносибан ҷойҳои аввалу дуввумро ишғол мекунад.

Тибқи маълумоти СММ, то соли 2025 норасоии обро аз се ду ҳиссаи аҳолии ҷаҳон эҳсос хоҳад кард. Аз ин рў, пешниҳоди Даҳсолаи байналмилалии амал “Об барои ҳаёт”, солҳои 2005-2015 аз ҷониби Тоҷикистон барои татбиқи нақшаҳои СММ ва дигар кишварҳои аъзо дар масъалаи дастрасӣ доштан ба об «саривақтию дорои аҳамияти ҷаҳонӣ мебошад». СММ соли 2002 дар маърўза оид ба вазъ ва дурнамои истифода ва таъмини сайёра бо оби тоза эътироф кардааст, ки ҳадафҳои дигари Рушди ҳазорсола, аз қабили паст кардани сатҳи камбизоатӣ, таҳсилот ва саломатӣ бидуни дастрасии одилона ба об ва энергетика наметавонанд амалӣ шаванд.

Дар баробари пешрафти назаррас дар татбиқи дастёбӣ ба Ҳадафҳои марбутаи Рушди ҳазорсола тавассути Даҳсолаи байналмилалии амал “Об барои ҳаёт”, солҳои 2005 – 2015 хатарҳои наве, чун тағйирёбии иқлим, афзоиши босуръати аҳолӣ ва ба ин восита зиёд шудани талабот ба неруи барқ ҷомеаи ҷаҳонро ба он водор намуд, ки бо анҷом ёфтани даҳсолаи мазкур ба ҳамкорӣ дар масъалаи об хотима нагузошта, ташаббусҳои наверо дар ҳалли мушкилоти об ироа намояд.

Аз ин рӯ, Ҷумҳурии Тоҷикистон зарур шуморид, ки ташаббуси чаҳоруми ҷаҳонии худро вобаста ба масъалаи об таҳти унвони Даҳсолаи байналмилалии амал “Об барои рушди устувор”, солҳои 2018 – 2028 пешниҳоди ҷомеаи ҷаҳон намояд. Ташаббуси мазкур нахустин маротиба аз ҷониби Президенти мамлакат муҳтарам Эмомалӣ Раҳмон дар Форуми 7 – уми умумиҷаҳонии об 12 апрели соли 2015 дар Ҷумҳурии Корея пешниҳод гардид. Ҳадафи асосии пешниҳоди ташаббуси мазкурро Президенти мамлакат идомаи татбиқи амалии тадбирҳои нақшавӣ дар чаҳорчӯбаи Даҳсолаи байналмилалии амалиёти «Об барои ҳаёт» ва ғанӣ сохтани онҳо ҷиҳати расидан ба Ҳадафҳои Рушди Устувор бо саъю талошҳои нав номиданд.

Тафсилоти бештар вобаста ба муҳимтарин паҳлӯҳои ду Даҳсолаи байналмилалии амал “Об барои ҳаёт”, солҳои 2005 — 2015 ва “Об барои рушди устувор”, солҳои 2018-2028, ки аз ҷониби Ҷумҳурии Тоҷикистон пешниҳод гардида буданд,  имрӯз соатҳои 10:30, 14:30 ва 20:30 дар барномаи таҳлилии “Сарват”–и радиои “Ховар” дар таҳияи муҳаррири барнома Манижа Баҳромзода пешниҳоди шунавандагон мегарданд.

АКС: АМИТ «Ховар»

Апрель 11, 2022 09:15

Хабарҳои дигари ин бахш

Дар барномаи «Сарват»-и Радиои «Ховар» чорабиниҳои сатҳи байналмилаливу минтақавӣ дар арафаи Конфронси дуюми байналмилалии сатҳи баланд тавзеҳ меёбанд
Дар барномаи «Набзи иқтисод»-и Радиои «Ховар» хатари истеъмоли обҳои газдору бегаз тавзеҳ меёбад
Дар барномаи таҳлилии «Сарват»-и Радиои «Ховар» омодагӣ ба Конфронси байналмилалии дуюми оби Душанбе баррасӣ мешавад
Дар барномаи таҳлилии «Сарват»-и Радиои «Ховар» мушкилоти ҷаҳонии обу иқлим ва нақши Тоҷикистон дар ҳалли он баррасӣ мегардад
Дар барномаи «Набзи иқтисод»-и Радиои «Ховар» масъалаи истифодаи самараноки замин ва мушкилоти хоҷагидорон баррасӣ мешавад
Дар барномаи «Сарват»-и Радиои «Ховар» масъалаи дастгирии молиявӣ барои мутобиқшавӣ ба тағйирёбии иқлим шарҳ дода мешавад
Барномаи таҳлилии «Сарват»-и Радиои «Ховар» паҳлӯҳои ҳуқуқии истифодаи обро тавзеҳ медиҳад
Дар барномаи «Сарват»-и Радиои «Ховар» мушкилоти ҷаҳонии обу иқлим баррасӣ мешаванд
Имрӯз — Рӯзи байналмилалии дарёҳо. Барномаи навбатии «Сарват»-и Радиои «Ховар» ба ин мавзӯъ бахшида мешавад
ВАО ва муаммоҳои экологӣ. Баррасии мавзӯъ дар барномаи таҳлилии «Сарват»-и Радиои «Ховар»
Аҳамияти эълони Соли байналмилалии ҳифзи пиряхҳо. Шарҳи мавзӯъ дар барномаи таҳлилии «Сарват»-и Радиои «Ховар»
Соли 2021 — яке аз ҳафт соли гармтарин дар таърих. Шарҳи мавзӯъ дар барномаи таҳлилии «Сарват»-и Радиои «Ховар»