Дар Душанбе таҳти унвони «Ҷаҳонишавӣ ва ҳифзи манфиатҳои миллӣ» конференсияи ҷумҳуриявӣ доир шуд
ДУШАНБЕ, 27.04.2022 /АМИТ «Ховар»/. 26 апрел дар Академияи идоракунии давлатии назди Президенти Ҷумҳурии Тоҷикистон бо ташаббуси Пажӯҳишгоҳи равандҳои сиёсӣ, дипломатия ва масоили ҷаҳонишавии Академия таҳти унвони «Ҷаҳонишавӣ ва ҳифзи манфиатҳои миллӣ» конференсияи ҷумҳуриявии илмӣ — амалӣ баргузор шуд, хабар доданд ба АМИТ «Ховар» дар Академия.
Ректори Академияи идоракунии давлатӣ Абдухалил Ғафурзода иброз дошт, ки “дар доираи татбиқи чорабиниҳои илмиву амалӣ дар Академияи идоракунии давлатӣ дар мавзӯъҳои муҳим ва мубрам конференсия ва машваратҳои сатҳи ҷумҳуриявӣ ва байналмилалӣ гузаронида мешаванд. Конференсияи ҷумҳуриявии илмӣ-амалии имрӯза дар мавзӯи «Ҷаҳонишавӣ ва ҳифзи манфиатҳои миллӣ» аз зумраи он чорабиниҳои илмиест, ки ба табодули андеша ва ақидаҳои нави олимону муҳаққиқони соҳавӣ дар самти ҷаҳонишавӣ ва ҳифзи манфиатҳои миллӣ барои амалисозии ин иқдоми муҳим заминаи устувор мегузорад.
Бо шарофати рушди босуръати илму техника ва ҳамкории иқтисодӣ дар даҳсолаҳои охир ҷаҳонишавӣ хусусияти умумибашарӣ гирифт. Дар раванди ҷаҳонишавӣ сохтори иқтисодиёти ҷаҳонӣ, ки сараввал аз иқтисодиёти миллӣ иборат буд, тағйир меёбад. Натиҷаи ҷаҳонишавӣ тақсими ҷаҳонии меҳнат, муҳоҷират, дар миқёси ҷаҳонӣ истифода шудани сармоя, қувваи корӣ, захираҳои истеҳсолӣ, ба ҳам мутобиқ намудани қонунгузорӣ, равандҳои иқтисодию технологӣ ва наздикшавии фарҳангҳои миллатҳои гуногун мебошад.
Дар конференсия зикр шуд, ки пайвастшавӣ ба ҷомеаи ҷаҳонӣ имкон дод, ки мамлакат аз беҳтарин таҷрибаи байналмилалӣ дар низоми давлатдорӣ бархурдор бошад. Низоми президентии давлатдорӣ ва парламентаризм дар Тоҷикистон, тартиби гузаронидани маъракаҳои пешазинтихоботӣ ва интихобот, иштироки мардум дар он, бисёрҳизбӣ, ҷомеаи шаҳрвандӣ, механизми қабули конститутсия, қонунгузорӣ, ташкили сохтору низоми ҳукуматдорӣ ва ғайра мисоли онанд.
Дар конференсия президенти Академияи миллии илмҳои Тоҷикистон Фарҳод Раҳимӣ, директори Маркази тадқиқоти стратегии назди Президенти Ҷумҳурии Тоҷикистон Хайриддин Усмонзода, мудири кафедраи таърихи халқи тоҷики Донишгоҳи миллии Тоҷикистон Ҷонибеки Асрориён, вакилони Маҷлиси намояндагони Маҷлиси Олии Ҷумҳурии Тоҷикистон Сарвиноз Маҷидзода ва Муҷибахон Ҷавҳарӣ сухан гуфтанд.
Ёдовар мешавем, ки конференсияи мазкур дар доираи «Ҳафтаи илм», ки аз 22 то 30 апрел дар Академияи идоракунии давлатӣ давом мекунад, доир гардид.
АКС: Академияи идоракунии давлатии назди Президенти Ҷумҳурии Тоҷикистон
Байни хонандагони муассисаҳои таълимии пойтахт озмуни шаҳрии «Тоҷи сари ҷумла ҳунарҳост илм» идома дорад
Хонандаи тоҷик дар мусобиқаи байналмилалӣ соҳиби медали тилло гардид
ТАЪТИЛИ БАҲОРӢ. Хонандагони муассисаҳои таълимии Тоҷикистон чанд рӯз истироҳат менамоянд?
Дар Донишгоҳи давлатии Хоруғ Маркази омӯзиши ташаббусҳои глобалии Президенти Ҷумҳурии Тоҷикистон оид ба масъалаҳои обу иқлим ифтитоҳ ёфт
Саҳми донишманди барҷастаи тоҷик Абӯрайҳони Берунӣ дар инкишофи илму техника назаррас аст. Эҳдо ба «Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф»
Президенти Тоҷикистон: «13 ҳазор нафар духтарони тоҷик дар давлатҳои хориҷӣ таҳсил менамоянд»
Дар Коллеҷи тиббии шаҳри Хуҷанд оид ба нақши Модар ҳамчун сарчашмаи зиндагӣ ҳамоиши идона доир шуд
Зиёда аз 14 ҳазор духтарон тибқи квотаи президентӣ муассисаҳои таҳсилоти олиро хатм намуда, ба нафъи давлату ҷомеа фаъолият доранд
Дар Кумитаи меъморӣ ва сохтмон оид ба арҷгузорӣ ба хизматҳои Зан-Модар ҳамоиши идона доир гардид
Дар Бохтар доир ба нақши технологияҳои рақамӣ дар воситаҳои ахбори омма конференсияи илмӣ-амалӣ баргузор гардид
Бахшида ба Рӯзи Модар дар Душанбе чорабинии сиёсӣ – фарҳангӣ таҳти унвони «Модар фариштаи меҳру шафқат» доир гардид
Гулнора Ҳоҷиева: «Барои ихтирои «Чордору» се сол пажуҳиш намудаам»
