Доир ба нақши худидоракунии маҳаллӣ дар таъмини рушди устувори Тоҷикистон конференсияи ҷумҳуриявӣ доир шуд

Апрель 29, 2022 17:11

ДУШАНБЕ, 29.04.2022 /АМИТ «Ховар»/. «Нақши худидоракунии маҳаллӣ дар таъмини рушди устувори Ҷумҳурии Тоҷикистон»-таҳти ин унвон имрӯз, 29 апрел дар Академияи идоракунии давлатии назди Президенти Ҷумҳурии Тоҷикистон бо ташаббуси Пажуҳишгоҳи идоракунии давлатӣ ва хизмати давлатии Академия бо иштироки васеи профессорону омӯзгорон, докторантону магистрантон конференсияи ҷумҳуриявии илмӣ-назариявӣ баргузор шуд. Дар ин бора ба АМИТ «Ховар» дар Академияи мазкур хабар доданд.

Ректори Академияи идоракунии давлатӣ Абдухалил Ғафурзода иброз дошт, ки дар солҳои соҳибистиқлолӣ бо ташаббус ва дастгирии Президенти Ҷумҳурии Тоҷикистон муҳтарам Эмомалӣ Раҳмон рушди мунтазами инфрасохтори деҳот таъмин гардида истодааст. Дар ин давра тамоми манотиқи мамлакат рушд карда, навоҳии кишвар симои худро дигар намуда, ба шаҳракҳо табдил ёфтанд.

Дар кори конференсия мушовири бахши Ёрдамчии Президенти Ҷумҳурии Тоҷикистон оид ба масъалаи кадрҳо Меҳрӣ Олимшо, муовини директори Агентии хизмати давлатии назди Президенти Ҷумҳурии Тоҷикистон Дилноза Аҳмадзода, муовини раиси Кумитаи рушди маҳали назди Президенти Ҷумҳурии Тоҷикистон Нуралӣ Риозода ва олимону устодони Академияи идоракунии давлатӣ сухан намуданд.

Яке аз самтҳои муҳими такомули низоми худидораи маҳал дар таъмини аҳолӣ бо ҷойҳои нави корӣ ва шуғли пурмаҳсул инъикос мегардад. Имрӯз дар ҷамоатҳои шаҳраку деҳот шуғл, аслан, дар шакли мавсимӣ қарор дорад. Дар ин замина, рушди инноватсионии хоҷагии коммуналӣ дар сатҳи мақомоти худидоракунии маҳаллӣ талаботи рушди инноватсионии Тоҷикистон аст. Омили дигар-дар такомули низоми худидораи маҳал ба инобат гирифтани низоми баробари рушди минтақаҳо дар сатҳи ҷамоатҳои дурдасти кӯҳистон ва навоҳии тобеи шаҳр аст. Барои таъмини минбаъдаи рушди мақомоти худидоракунии маҳаллӣ бояд соҳибкории хурду миёна ҳаматарафа дастгирӣ карда шавад. Бояд ба соҳибкории хурду миёна қарзҳои имтиёзнок дода шаванд ва ҷиҳати ҳалли масоили иҷтимоӣ ташаббуси ташкилоти ҷомеаи шаҳрвандӣ дастгирии қавӣ ёбад.

Зикр шуд, ки ҷиҳати татбиқи ҳукумати электронӣ дар маҳал, иртиботи хуби аҳолӣ бо ҷамоат, аз байн рафтани ҳолатҳои коррупсионӣ бояд дар ҷамоатҳо сомонаҳои расмии мақомоти худидоракунии шаҳрак ва деҳот ва почтаҳои электронӣ таъсис дода шаванд. Агар гардиши ҳуҷҷатҳои электронӣ ва табодули дохилии иттилооти мақомоти иҷроияи ҳокимияти давалатӣ дар хати «марказ-минтақаҳо – муқомоти худидораи маҳал – ташкилоти ҷомеаи шаҳрвандӣ» беҳтар гардонида шавад, ҳамон андоза сифат ва сатҳи низоми худидора беҳтар мегардад.

Мавриди зикр аст, ки конференсияи ҷумҳуриявии мазкур дар доираи лоиҳаи илмӣ-таҳқиқотӣ дар мавзӯи «Худидоракунии маҳаллӣ дар Ҷумҳурии Тоҷикистон: назария, амалия ва дурнамои рушд» (2021-2025) доир гардид.

АКС: Академияи идоракунии давлатии назди Президенти Ҷумҳурии Тоҷикистон

Апрель 29, 2022 17:11

Хабарҳои дигари ин бахш

«БАЧА АЗИЗ, ОДОБАШ АЗ ОН АЗИЗТАР…». Ба таълиму тарбияи фарзандон набояд бетарафӣ зоҳир намуд
Маркази тадқиқоти стратегии Тоҷикистон ва Институти байналмилалии Осиёи Марказӣ масоили ҳамкории илмию таҳлилиро баррасӣ намуданд
35-СОЛАГИИ ИСТИҚЛОЛИ ДАВЛАТӢ. Беморхонаи марказии ноҳияи Темурмалик пурра навсозӣ гардид
ЗАБОН ДОНӢ-ҶАҲОН ДОНӢ. Аз 1 апрел кормандони мақомоти давлатӣ, худидоракунии маҳаллӣ ва ташкилотҳои давлатӣ ба омӯзиши ҳатмии забонҳои хориҷӣ фаро гирифта мешаванд
Дар ноҳияи Айнӣ сеюмин ҳамоиши гирандагони стипендияи президентӣ баргузор шуд
НАВРӮЗИ ХУҶАСТАПАЙ МУЖДАИ НЕКИ БАҲОРИ ХУРРАМ. Дар Суғд Ҷашни байналмилалии Наврӯз бо шукуҳи хоса таҷлил шуд
Тоҷикистон терроризму ифротгароиро қотеона маҳкум менамояд
24 МАРТ — РӮЗИ ҶАҲОНИИ МУБОРИЗА БО БЕМОРИИ СИЛ. Ҳадаф аз он огоҳӣ, пешгирӣ ва мубориза бар зидди ин беморӣ мебошад
ИМРӮЗ ДАР ТОҶИКИСТОН — РӮЗИ ГУЛ ВА НИҲОЛШИНОНӢ. Соли 2023 дар ҷумҳурӣ беш аз 1 миллион бех ниҳоли дарахтони гуногун шинонида шуд
МАСЛИҲАТИ МУТАХАССИС. Истеъмоли гулкарам масунияти инсонро боло мебардорад
МАСЛИҲАТИ МУТАХАССИС. Истеъмоли ғизои солим беҳтарин роҳи ҳифзи солимии шахс мебошад
Кормандони Вазорати меҳнат, муҳоҷират ва шуғли аҳолӣ ҷашни Наврӯзро бо тантана таҷлил намуданд