АХБОР БАРОИ АФКОР. Дар Узбекистон дар 77 кӯдак бемории генетикии нодир ошкор шуд

Май 4, 2022 11:05

ДУШАНБЕ, 04.05.2022 /АМИТ «Ховар»/. Дар Узбекистон дар 77 кӯдак бемории генетикии нодир ошкор шуд. Сабаби чоряки онҳо издивоҷи хешутаборӣ мебошанд, хабар медиҳад АМИТ «Ховар» бо истинод ба саҳифаи Telegram-и хадамоти матбуоти Вазорати тандурустии Узбекистон.

Дар кӯдакон бемории атрофияи мушакҳои сутунмӯҳра мушоҳида карда мешавад. Дар бораи сабабҳои ин беморӣ муовини Вазири тандурустии ин кишвар Элмира Баситхонова маълумот дод.

Ба гуфтаи ӯ, атрофияи мушакҳои сутунмӯҳра бемории нодири ирсӣ буда, дар кӯдак дар давраи ҳомиладории модар пайдо мешавад. Табобати ин бемориро бояд пас аз ним соли таваллуди кӯдак оғоз намуд. Дар акси ҳол як қисми кӯдакони бемор дар дусолагӣ мефавтанд.

«Омори байналмилалӣ нишон медиҳад, ки ин навъи беморӣ дар саросари ҷаҳон миёни 610 ҳазор дар як нафар тифл вомехӯрад. 50 дарсади беморони хурдсол то дусолагӣ бар асари норасоии нафас мефавтанд», — гуфт Э.Баситхонова.

«Аз 77 кӯдаки гирифтори ин беморӣ 24% дар натиҷаи издивоҷи хешутаборӣ, 40% дар оилаҳое, ки ду ва зиёда фарзанди дорои атрофияи мушакҳои сутунмӯҳра доранд ва 36% дар оилаҳое таваллуд шудаанд, ки ҳам падар ва ҳам модар барандагони ин ген мебошанд»,-изҳор дошт муовини Вазир.

Қаблан хабар дода шуда буд, ки бо мақсади пешгирии интиқоли бемориҳои ирсӣ аз 1 июли соли 2023 дар Узбекистон санҷиши молекулавӣ-генетикии шахсони никоҳкунанда гузаронида мешавад.

Тавре Агентии миллии иттилоотии «УзА» қаблан иттилоъ дода буд, дар Узбекистон қонуне қабул карда мешавад, ки тибқи он навхонадорон аз ин ба баъд аз ташхиси молекулавӣ-генетикӣ хоҳанд гузашт. Қарори мазкурро чанде пеш Президенти Ҷумҳурии Узбекистон Шавкат Мирзиёев ба имзо расонд. Ҳадафи ин ташаббус, ки онро нақша доранд аз 1 июли соли 2023 татбиқ намоянд, пеш аз ҳама, роҳ надодан ба никоҳи хешутаборӣ мебошад.

Ҳамин тариқ, Узбекистон дар ин масъала роҳи Тоҷикистонро пуштибонӣ намуд. Тавре маълум аст, қонуни ҳаммонанди Ҷумҳурии Тоҷикистон аз 1 июли соли 2016 бо ташаббуси Президенти Ҷумҳурии Тоҷикистон Эмомалӣ Раҳмон ба ҳуқми иҷро даромад. Тибқи ин санад, издивоҷ бо писарамак ва духтарамак, инчунин писартағову духтарамма манъ аст. Ҳамин гуна, пеш аз издивоҷ аз муоинаи тиббӣ гузаштан низ ҳатмӣ буда, он ройгон аст. Дар сурати муайян намудани бемории сироятӣ дар яке аз никоҳкунандагон онҳо бояд аз давраи табобатӣ гузашта, пас аз пурра шифо ёфтан ба онҳо барои ақди никоҳ иҷозат дода мешавад.

Тибқи иттилои Вазорати тандурустӣ ва ҳифзи иҷтимоии аҳолии Ҷумҳурии Тоҷикистон, то замони қабули ин қонун дар кишвар беш аз 26 ҳазор кӯдаки маъюб сабти ном шуда буд. 35 дарсади онҳо фарзандони оилаҳоеанд, ки хешовандони наздиканд ва аз 10 то 20 фоизи дигарашон фарзандони волидонеанд, ки гирифтори бемориҳои сироятӣ мебошанд.

АКС: АБИ «Казинформ»

Май 4, 2022 11:05

Хабарҳои дигари ин бахш

КӢ ХОДИМИ ДИН ШУДА НАМЕТАВОНАД. Парлумони Тоҷикистон ба қонун дар бораи озодии виҷдон ва иттиҳодияҳои динӣ тағйирот ворид намуд
Наврасони Хоруғ ба лагери дараи Ромити шаҳри Ваҳдат раҳсипор гардиданд
Дар Душанбе «Барномаи давлатии рушди ғизои мактабӣ дар Ҷумҳурии Тоҷикистон барои солҳои 2022-2027» муаррифӣ шуд
13 деҳаи ноҳияи Файзобод бо фарогирии 19717 нафар аҳолӣ бо оби тозаи нӯшокӣ таъмин карда мешаванд
Музаффар Ашуриён дар Форуми 10-уми байналмилалии ҳуқуқӣ дар Санкт-Петербург иштирок дорад
Омӯзгорону касбомӯзони «Маркази таълими калонсолони Тоҷикистон» барои ҳайати Узбекистон дарси маҳорат гузарониданд
Дар Ҷамоати деҳоти Ворухи Исфара пас аз офати табиӣ дастрасӣ ба оби нӯшокӣ ва полезӣ таъмин гардид
МОҲИ ИЮЛ ТОҶИКИСТОНИЁНРО ЧӢ ГУНА ҲАВО ИНТИЗОР АСТ? Ба ин суоли АМИТ «Ховар» муовини Директори Агентии обуҳавошиносӣ Ҷамила Байдуллоева посух дод
ЭҲТИЁТ ШАВЕД, «ЧИЛЛА»-И ТОБИСТОН! Дар Тоҷикистон ин рӯзҳо ҳарорати ҳаво то ба 45 дараҷа мерасад
Дар ноҳияи Кӯшониён пули дарозиаш 85-метра ба истифода дода шуд
Корҳои кашидани хатти оби нушокӣ аз деҳаи Калтачинор ба маркази ноҳияи Балҷувон оғоз гардиданд
Ба Тоҷикистон беш аз 200 ҳазор воя ваксинаи намуди «Pfizer» ворид карда шуд