Дар Душанбе Вохӯрии машваратии сарони давлатҳои Осиёи Марказӣ баргузор мешавад
ДУШАНБЕ, 14.05.2022 /АМИТ «Ховар»/. Вазирони корҳои хориҷии кишварҳои Осиёи Марказӣ (ОМ) зимни ҷаласа дар Душанбе омодагиҳо ба чаҳорумин Вохӯрии машваратии сарони давлатҳои Осиёи Марказиро, ки қарор аст соли ҷорӣ дар пойтахти Тоҷикистон баргузор шавад, баррасӣ карданд.
13 май дар шаҳри Душанбе таҳти раёсати Вазири корҳои хориҷии Ҷумҳурии Тоҷикистон Сироҷиддин Муҳриддин ҷаласаи навбатии роҳбарони мақомоти корҳои хориҷии кишварҳои Осиёи Марказӣ баргузор гардид. Дар ҷаласа таъкид гардид, ки нигоҳ доштани муколамаи эътимодбахши сиёсӣ ва густариши минбаъдаи муносибатҳо байни давлатҳои Осиёи Марказӣ бешак авлавияти асосӣ мебошад. Дар ин бора ба АМИТ «Ховар» дар Вазорати корҳои хориҷии Тоҷикистон хабар доданд.
Вазирони корҳои хориҷӣ масъалаҳои ҳамкории бисёрҷонибаро дар бахшҳои сиёсӣ, тиҷоратию иқтисодӣ, фарҳангӣ, гуманитарӣ ва ғайра баррасӣ карда, перомуни мавзӯъҳои мубрами рӯзномаи минтақавӣ ва байналмилалӣ табодули афкор намуданд.
Дар ҷаласа ҳамчунин ба татбиқи бандҳои Изҳороти муштарак аз натиҷаи Вохӯрии сеюми машваратии сарони давлатҳои Осиёи Марказӣ (Аваза, 6 августи соли 2021) таваҷҷуҳи махсус зоҳир карда шуд.
«Ҳамчунин оид ба масъалаҳои омодагӣ ва баргузории Вохӯрии навбатии машваратии сарони давлатҳои Осиёи Марказӣ табодули афкор сурат гирифт», — гуфтанд дар Вазорати корҳои хориҷии ҶТ.
Ҳамзамон, гуфта шуд, ки «Аҳдномаи дӯстӣ, ҳамсоягии нек ва ҳамкорӣ барои рушди Осиёи Марказӣ дар асри 21, ки дар доираи нишасти дарпешистода ба имзо расонида мешавад, оғози давраи нави хамкории кишварҳои минтақа хоҳад гардид».
Ёдовар мешавем, ки нахустин Вохӯрии машваратии сарони давлатҳои Осиёи Марказӣ моҳи марти соли 2018 дар Қазоқистон, дуюмин – моҳи ноябри соли 2019 дар Узбекистон ва сеюмин – моҳи августи соли 2021 дар Туркманистон баргузор шуд. Дар вохӯрии охир Президенти Ҷумҳурии Тоҷикистон муҳтарам Эмомалӣ Раҳмон аз миёни сарони давлатҳои минтақа аввалин шуда мукофоти олӣ — Нишони фахрии сарони давлатҳои Осиёи Марказиро сарфароз гаштанд. Ин мукофот ба Пешвои миллат Эмомалӣ Раҳмон «барои хизматҳои шоиста дар рушди муносибатҳои дӯстӣ, ҳамсоягии нек, ҳамдигарфаҳмӣ ва ҳамкории давлатҳои Осиёи Марказӣ, таҳкими сулҳу амният дар минтақа, пешбурди манфиатҳо ва ташаббусҳои муштараки кишварҳои минтақа дар арсаи байналмилалӣ» тақдим карда шуд.
ДАР АКС: иштирокчиёни сеюмин Вохӯрии машваратии сарони давлатҳои Осиёи Марказӣ дар Аваза (Туркманистон), августи соли 2021
Дар Душанбе масъалаҳои вобаста ба вохӯрии вазирони корҳои хориҷии формати «Осиёи Марказӣ-Ҳиндустон» баррасӣ гардид
Дар шаҳри Кокшетауи Қазоқистон намоиш-фурӯши маҳсулоти кишоварзию саноатии Тоҷикистон баргузор гардид
Сироҷиддин Муҳриддин бо роҳбарони ҳайатҳои кишварҳо ва созмонҳои байналмилалӣ мулоқотҳои судманд анҷом дод
Муовини якуми Сарвазири Тоҷикистон бо Вазири давлатии Ҷопон оид ба корҳои хориҷӣ мулоқот намуд
Муовини Сарвазири Тоҷикистон Дилрабо Мансурӣ бо муовини Сарвазири Шоҳигарии Лесото Ҷастис Нтоменг Ҷастина Маҷара мулоқот намуд
Дар Амороти Муттаҳидаи Араб оид ба ташаббусҳои ҷаҳонии Президенти Тоҷикистон баёнияи матбуотӣ нашр гардид
Мулоқоти Сарвазири Тоҷикистон Қоҳир Расулзода бо муовини Сарвазири Озарбойҷон Самир Рауф доир гардид
Сарвазири Тоҷикистон Қоҳир Расулзода бо ноиби Президенти Ҷумҳурии Малдив Ҳусейн Муҳаммад Латиф мулоқот намуд
Амина Муҳаммад аз давлатҳои ҷаҳон дар самти ҳалли масоили марбут ба ҳифзи пиряхҳои сайёраи Замин даъвати оҷилӣ намуд
Директори иҷроияи Бунёди иқлими сабз пешсафии афзояндаи Тоҷикистонро дар ҳалли мушкилоти глобалии иқлим ва ҳифзи пиряхҳо ситоиш намуд
Армида Салсиаҳ Алишаҳбана: «ЭСКАТО ҳамкории судмандро бо Тоҷикистон муҳим арзёбӣ менамояд»
Амина Муҳаммад, муовини аввали Дабири кулли СММ: «Ташаббуси Президенти Тоҷикистон барои муттаҳидии ҷомеаи ҷаҳонӣ дар баррасии мушкилоти ҷиддии иқлимӣ муҳим мебошад»
