Дар Суғд ба 130 нафар донишҷӯёну магистрантон ва аспирантон стипендияи Раиси вилоят супорида шуд

ДУШАНБЕ, 24.05.2022 /АМИТ «Ховар»/. 23 май дар толори мақомоти иҷроияи ҳокимияти давлатии вилояти Суғд​ маросими супоридани стипендияҳои Раиси вилоят барои соли хониши 2021-2022 баргузор шуд, хабар медиҳад АМИТ «Ховар» бо истинод ба Хадамоти матбуоти Раиси вилояти Суғд.

Раиси вилояти Суғд Раҷаббой Аҳмадзода дар вазъияти тантанавӣ ба​ 130 нафар донишҷӯёну магистрантон ва аспирантони муассисаҳои таҳсилоти олӣ ва миёнаи касбии вилоят​ стипендия супорида, муҳассилинро ба муносибати Рӯзи ҷавонони Тоҷикистон табрик намуд.

Зикр шуд, ки​ татбиқи муваффақонаи сиёсати давлатии ҷавонон имрӯз яке аз муҳимтарин самтҳои сиёсати Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон маҳсуб шуда, ба фаъолияти ҷавонон, бахусус донишҷўёну магистрантон ва аспирантон эътибори бештар зоҳир мегардад.

Ҷавонони кишвар, аз ҷумла, ҷавонони вилояти Суғд низ дар таҳкими пояҳои давлатдорӣ, рушди босуботи ҷомеа ва пешбурду татбиқи сиёсати Президенти Ҷумҳурии Тоҷикистон муҳтарам Эмомалӣ Раҳмон, Ҳукумати Ҷумҳурии Тоҷикистон ва мақомоти иҷроияи ҳокимияти давлатии вилоят нақши муҳим доранд.​

Алҳол дар вилоят 7 муассисаи таҳсилоти олии касбӣ ва 22 муассисаи таҳсилоти миёнаи касбӣ фаъолият доранд, ки дар ин муассисаҳо аз рӯи 130 ихтисос мутахассис тайёр карда мешавад.​

Дар соли хониши 2021-2022 шумораи умумии донишҷӯёни муассисаҳои таҳсилоти олӣ ва миёнаи касбии вилоят, дар маҷмӯъ беш аз 69 ҳазору 936 нафарро ташкил медиҳад. Ҳамчунин дар ҳудуди вилоят​ 943 нафар магистранту аспирантон ба таҳсилу таҳқиқ машғуланд. ​

Аз 367 нафар довталабон 130 нафар донишҷўёну магистрантон ва аспирантони муассисаҳои таҳсилоти олӣ ва миёнаи касбии вилоят ба гирифтани стипендияи Раиси вилоят аз ҷониби комиссия интихоб ва пешбарӣ шуданд.

 АКС: Хадамоти матбуоти Раиси в. Суғд