МУҲОКИМАИ ПАРЛУМОНӢ. Мавзӯи лоиҳаи идоракунии захираҳои обӣ дар ҳавзаи дарёи Панҷ баррасӣ шуд

Май 26, 2022 13:35

ДУШАНБЕ, 26.05.2022 /АМИТ «Ховар»/. Имрӯз таҳти раёсати муовини Раиси Маҷлиси намояндагони Маҷлиси Олии Ҷумҳурии Тоҷикистон Қодири Қосим бо ташаббуси Кумита оид ба масъалаҳои аграрӣ, захираҳои об ва замини Маҷлиси намояндагони Маҷлиси Олии Ҷумҳурии Тоҷикистон дар мавзӯи лоиҳаи «Идоракунии захираҳои обӣ дар ҳавзаи дарёи Панҷ» (маблағгузории иловагӣ) муҳокимаи парлумонӣ доир гардид. Дар ин бора ба АМИТ «Ховар» дар Маҷлиси намояндагон хабар доданд.

Дар муҳокимаи парлумонӣ вакилон, намояндагони Кумитаи ҳифзи муҳити зисти назди Ҳукумати Ҷумҳурии Тоҷикистон, Кумитаи давлатии сармоягузорӣ ва идораи амволи давлатии Ҷумҳурии Тоҷикистон ва Агентии обуҳавошиносӣ иштирок намуданд.

Вакили Маҷлиси намояндагон Сурайё Дустмуродзода зимни баррасии масъалаи мазкур иброз намуд, ки «бо мақсади татбиқи самаранок ва мақсадноки лоиҳаи мазкур Гурӯҳи татбиқи лоиҳа дастуру супоришҳои Ҳукумати Ҷумҳурии Тоҷикистон, Кумитаи ҳифзи муҳити зисти назди Ҳукумати Ҷумҳурии Тоҷикистон, Кумитаи давлатии сармоягузорӣ ва идораи амволи давлатии Ҷумҳурии Тоҷикистон, Агентии обуҳавошиносӣ ва Бонки Осиёгии Рушдро ба роҳбарӣ гирифта, ҳамкориро бо дигар вазорату идораҳои ҷумҳурӣ ба роҳ мондааст.

Гурӯҳи татбиқи лоиҳа дар якҷоягӣ бо Агентии обуҳавошиносии Кумитаи ҳифзи муҳити зисти назди Ҳукумати Ҷумҳурии Тоҷикистон вазифа ва мақсадҳои дар назди лоиҳа гузоштаро мавриди баррасӣ қарор дода, барои сари вақт амалӣ гардидани онҳо чорабиниҳои заруриро амалӣ намуда истодааст».

Дар доираи татбиқи лоиҳа чорабиниҳои зерин амалӣ карда шуданд:

Бо мақсади татбиқи саривақтии лоиҳа тибқи тартиботи муқарраргардида Низомномаи фаъолияти Гурӯҳи татбиқи лоиҳа омода гардида, аз ҷониби Агентии иҷроия тасдиқ карда шуд.

Ҷиҳати сари вақт татбиқ намудани лоиҳа Гурӯҳи татбиқи лоиҳа таъсис дода шуда, тибқи тартиби муқарраргардида, 12 нафар мутахассисони миллӣ ба кор ҷалб карда шуданд.

Барои ҳамоҳангсозии корҳои лоиҳа тибқи талаботи Бонки Осиёии Рушд, дар асоси озмун ширкати байналмилалии мушовирии FCG (Финляндия) интихоб гардида, 5 июни соли 2019 байни ширкати мазкур ва Агентии обуҳавошиносӣ қарордод ба имзо расид. Дар доираи қарордоди мазкур 6 нафар мушовирони байналмилалӣ ва 6 нафар мушовирони миллӣ ба кор ҷалб гардиданд.

Яке аз самтҳои татбиқи лоиҳа- ин таҷдиди бинои асосӣ ва хизматрасонии Агентии обуҳавошиносӣ ба шумор меравад. Бояд зикр намуд, ки ба тавозуни Агентии обуҳавошиносӣ гузаронидани иншооти сохтмонаш нотамоми «Корпуси муҳандисию озмоишии обуҳавошиносӣ» талаботи Созишномаи байни Ҳукумати Ҷумҳурии Тоҷикистон ва Бонки Осиёии Рушд ба шумор мерафт.

Дар доираи қисмати беҳтар намудани системаи пешгӯӣ ва огоҳкунии ҳодисаҳои обхезӣ дар ҳавзаи дарёи Панҷ номгӯи таҷҳизоти обуҳавошиносӣ барои минтақаҳои пилотӣ (дидбонгоҳҳо ва стансияҳои обуҳавошиносӣ) дар ҳамкорӣ бо мушовирони байналмилалӣ ва кормандони масъули Агентии обуҳавошиносӣ бо Агентии иҷроия омода гардида истодаанд.

Аз рӯи масъалаи мазкур раиси кумитаи Маҷлиси намояндагон оид ба масъалаҳои аграрӣ, захираҳои об ва замин Рустам Латифзода ва директори Гурӯҳи татбиқи лоиҳаи мазкур Муҳибулло Ҷунайдов сухан гуфтанд.

Дар анҷоми муҳокимаи парлумонӣ роҷеъ ба масъалаи мазкур қарори дахлдор қабул карда шуд.

Акс: МН МО ҶТ

Май 26, 2022 13:35

Хабарҳои дигари ин бахш

Маърифати ҳуқуқии шаҳрвандони Тоҷикистон кафили амнияти ҷомеа мебошад
Созишномаи қарзӣ байни Ҷумҳурии Тоҷикистон ва Бонки исломии рушд вобаста ба лоиҳаи таҷдиди роҳ ба тасвиб расид
Дар Душанбе таҳкиму тавсеаи робитаҳои байнипарлумонӣ байни Тоҷикистон ва Чин баррасӣ гардид
Раиси Маҷлиси миллии Маҷлиси Олии Ҷумҳурии Тоҷикистон Рустами Эмомалӣ ба Раиси Маҷлиси Шурои исломии Ҷумҳурии Исломии Эрон Муҳаммадбоқир Қолибоф барқияи изҳори тасаллӣ ирсол намуданд
Дар Маҷлиси намояндагони Маҷлиси Олии Ҷумҳурии Тоҷикистон машварати корӣ баргузор гардид
Дар Душанбе раисони кумитаҳои Маҷлиси намояндагон ва намояндагони Бонки ҷаҳонӣ мулоқот намуданд
ҚАБУЛИ ҚОНУНИ МИЛЛӢ ДАР ТАҲРИРИ НАВ. Он ба таҳкими сатҳи маънавиёти шаҳрвандон ва некуаҳволии шахс, оила ва ҷомеа равона шудааст
ҚОНУНИ МИЛЛӢ ДАР ТАҲРИРИ НАВ ҚАБУЛ ГАРДИД. Акнун тарбияи кӯдак аз ҷониби се ниҳоди иҷтимоӣ — оила, мактаб ва ҷомеа амалӣ мешавад
Ҳамкории байнипарлумонии Тоҷикистон бо Узбекистон ва Қатар баррасӣ шуд
Вакилони Парлумони Тоҷикистон дар ҳамоиш оид ба ҳифзи арзишҳои демократӣ дар шаҳри Брюссел иштирок доранд
Мавсума Муинӣ дар доираи Форуми занони Осиё бо Танзила Норбоева мулоқот намуд
Мавсума Муинӣ: «Ҳукумати Тоҷикистон баҳри таъмини риояи ҳуқуқҳои конститутсионии занон тадбирҳои муҳим меандешад»