«25 соли Ваҳдат миллӣ 25 соли эҳёи иттиҳоду баҳамоии мост!»,- мегўяд Илёс Ғаффорзода, директори Донишкадаи такмили ихтисоси омӯзгорони муассисаҳои таҳсилоти олии касбии назди ДМТ

Июнь 26, 2022 12:09

ДУШАНБЕ, 26.06.2022 /АМИТ «Ховар»/. «Имрӯз мо дар арафаи яке  аз бузургтарин дастовардҳои миллати тоҷик – 25-солгарди Ваҳдати миллӣ, ки дар саҳифаҳои таърих бо ҳарфҳои заррин сабт гардидааст, қарор дорем. Аз рӯзи баимзорасии «Созишномаи умумии истиқрори сулҳ ва ризоияти миллӣ дар Тоҷикистон» чоряк аср мегузарад, ки метавон онро чун  25 соли эҳёи миллию баҳамоӣ, 25 баҳори худшиносию худсозӣ, 25 соли сулҳу суботу оромӣ ва 25 қадами устувор дар роҳи сохтори ҷомеаи озоди шаҳрвандӣ ба қалам дод», — чунин ибрози назар намудааст директори Донишкадаи такмили ихтисоси омӯзгорони муассисаҳои таҳсилоти олии касбии назди Донишгоҳи миллии Тоҷикистон Илёс Ғаффорзода дар мақолаи хеш, ки ба унвонии АМИТ «Ховар» ирсол гардидааст.

Дар зер андешаҳои Илёс Ғаффорзодаро бахшида ба ҷашни Ваҳдати миллӣ пешниҳоди хонандагон менамоем.

— Ин санади сарнавиштсоз Тоҷикистонро аз вартаи ҳалокат ва нобудӣ наҷот дод, ба чакидани охирин қатраи ашки чашмони модари тоҷик хотима бахшид, ба миллати тоҷик руҳу илҳоми нав бахшида, дар сарҷамъ кардани миллат, иттиҳоду ягонагии мардум нақши бебаҳо гузошт. Се даҳа пеш тоҷик нав ба ормони таърихии худ-истиқлолияти давлатӣ расида буд, ки гирифтори даргириҳои дохилӣ, бозиҳои пасипардагӣ, сиёсатҳои духӯраи мамлакатҳои абарқудрат гардид. Давлат, миллат, истиқлолиятро нестшавӣ таҳдид мекарду сарзамини тоҷикон дигарбора рӯёрӯи бозии таърих ва «табартақсим» гашта буд.

Миллат ба марҳилае рӯ ба рӯ гашта буд, ки «доираҳои муайяни мамлакатҳои хориҷӣ ва баъзе қувваю гурӯҳҳои дохилӣ низ манфиатдори идома ёфтани ҷанг, барбод рафтани давлат ва пароканда шудани миллати тоҷик буданд. Онҳо ба оташи ҷанги шаҳрвандӣ равған мерехтанд ва намегузоштанд, ки халқи тоҷик иродаи худро озодона изҳор карда, ҳамчун миллати соҳибдавлат обруманд гардад.

Гузашта аз ин, нақшаи тақсими Тоҷикистонро мекашиданд ва ҳатто дар назди созмонҳои байналмилалӣ масъалагузорӣ мекарданд. Маҳз дар ин марҳилаи тақдирсозу таърихсоз «Созишномаи умумӣ дар бораи истиқрори сулҳ ва ризоияти миллӣ» ба имзо расид. Ҳамин аст, ки Ваҳдати миллӣ дар таърихи миллат аз арзише баробар ба арзиши истиқлолияти давлатӣ бархӯрдор аст ва ҳатто фаротар аз он, зеро пойдориву таҳкими истиқлолият маҳз бастагӣ ба ваҳдату ҳамдилии миллат дорад.

Ҷанги таҳмили тоҷик бештар аз сад ҳазор шаҳрвандро қурбон, садҳо ҳазор модарро гирён, ҳазорҳо фарзандро бепадару садҳо занро бешавҳар карда буд. Ҷанги таҳмилии Тоҷикистон ширинии кӯдакии 55 ҳазор тифлро рабуд ва онҳоро ятими хорузор кард. 10-ҳо  миллиард доллари амрикоӣ зиёни моддӣ расонид.

Дар робита ба ҷойгоҳи ваҳдати миллӣ дар ҷомеа Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон иброз доштаанд: «Ҳар касе, ки ниҳолеро сабзонда бошад, медонад дарахт соле як бор ҳосил медиҳад. Аммо ниҳоле ҳаст, ки ҳамеша меваи ширин ба бор меорад. Ин  ниҳол ниҳоли дӯстӣ ва ваҳдат аст. Мо меваи ширини ин ниҳоли сабзондаамонро чашидем, ҷомеаи мо аз он баҳравар гардид ва мо ҳаргиз роҳ намедиҳем, ки дигар теша ба решаи он расад… Ваҳдат барои мо як вожа ё калимаи одӣ нест, балки номаи тақдири мо, шарти пешрафти кишварамон ба сӯйи ояндаи ободу осуда ва муҳимтар аз ҳама, кафили сарҷамъиву хушбахтии имрӯзу ояндаи халқамон аст».

Воқеан, ваҳдати миллӣ ҳамгуни ниҳоли борваре ҳаст, ки бо гузашти замон решаҳояш амиқтару мустаҳкамтар ва мевааш ширинтару серобтар мегардад, вале нигаҳ доштану посдорияш аз ҳуҷуми зоғу заған ва аз зарари ҳар гуна ҳашарот масъулияти бештар аз пештарро талаб менамояд. Агар имрӯз мо тоҷикон ҳамчун миллати ваҳдатофару созанда ва ташаббусгари бузургтарин тарҳҳои байналмилалӣ эътироф мегардему барои хушбахтии башарият талош меварзем, ҳама аз баракати ваҳдати миллӣ ва самараи ин ниҳоли ҳамешасабз мебошад.

Имрӯз ҷаҳон ба таҳаввулоти ҷиддии сиёсӣ рӯ ба рӯ гаштаасту ҳеҷ давлате аз гирифтор шудан ба даргирии дохилӣ ва аз даст додани давлати миллии мардуммеҳвар эмин нест. Пойдорӣ дар баробари чунин туфонҳои худсохта танҳо бо ваҳдати милливу ҳамдиливу ҳамбастагӣ ба даст меояд. Пас, бо амалигардонии дастуру ҳидоятҳои Пешвои муаззами миллат аз як гиребон сар бароварда, намегузорем, то нохалафу сияҳдиле чашм ба ин марзу бум ало намояду барои ноором кардани зиндагии орому осоиштаи мардум мушкиле эҷод намояд.

АКС: АМИТ «Ховар»

Июнь 26, 2022 12:09

Хабарҳои дигари ин бахш

Заҳмати беш аз 2000 нафар кормандони соҳаи маориф ва омӯзгорони вилояти Хатлон қадрдонӣ гардид
ЯРМАРКАИ МАКТАБӢ. «Нассоҷии тоҷик» барои беҳтар намудани стандарти либосҳо аз таҷҳизоти муосири ҷаҳонӣ истифода мебарад
Омӯзгорон ва устоҳои таълими истеҳсолии литсейҳои ВМКБ ба шаҳри Кӯлоб сафари омӯзишию сайёҳӣ намуданд
Бунёди бинои нуҳошёнаи Донишгоҳи давлатии Хоруғ дубора шурӯъ гардид
Сокинони деҳаи Меҳргони шаҳри Турсунзода мактаб месозанд
Дар зарфи 65 сол факултети сохтмон ва меъмории ДТТ беш аз 15 ҳазор муҳандис-сохтмончӣ ва меъмор омода намудааст
Дар Хоруғ оид ба мубодилаи электронии ҳуҷҷатҳо дар мақомоти давлатӣ даври сайёри такмили ихтисос гузаронида шуд
Анҷумани VIII маҳфили «Ҷавононе, ки дар хориҷи кишвар таҳсил мекунанд» оғоз гардид
Низомиёни рус ба хонандагони литсейи Душанбе кумаки башардӯстона расониданд
МАРКАЗИ МИЛЛИИ ТЕСТӢ: Имрӯз давраи азнавбақайдгирии довталабон барои иштирок дар озмуни тақсимоти такрорӣ оғоз ёфт
Татбиқи «Стратегияи миллии рушди маорифи Ҷумҳурии Тоҷикистон барои давраи то соли 2030» баррасӣ гардид
«НЕРУИ АҚЛ». Дар мактабҳои Тоҷикистон лоиҳаи омӯзиши илмҳои дақиқ ба забони русӣ оғоз мешавад

Маводҳои таҳлилӣ