БОРИ АВВАЛ ДАР ТОҶИКИСТОН! Пагоҳ дар шаҳри Душанбе Олимпиадаи байналмилалии технологияҳои иттилоотии «ISI Junior-2022» оғоз мегардад

ДУШАНБЕ, 30.06.2022 /АМИТ «Ховар»/. Пагоҳ, 1 июл дар шаҳри Душанбе тибқи Қарори Раиси шаҳри Душанбе Рустами Эмомалӣ аз 9 феврали соли 2022 нахустин Олимпиадаи байналмилалии технологияҳои иттилоотии «ISI Junior-2022» дар Тоҷикистон оғоз мегардад. Дар ин бора ба АМИТ «Ховар» сардори шуъбаи муассисаҳои томактабӣ ва таҳсилоти умумии Сарраёсати маорифи шаҳри Душанбе Асомиддин Бобозода иттилоъ дод.

Бори аввал аст, ки дар Тоҷикистон аз 1 то 7 июл Олимпиадаи байналмилалии технологияҳои иттилоотии «ISI Junior-2022» доир мегардад ва дар он иштирокчиён аз 13 кишвари ҷаҳон даъват шудаанд.

Олимпиада ба Бистсолаи омӯзиш ва рушди фанҳои табиатшиносӣ, риёзӣ ва дақиқ (солҳои 2020-2040), ки бо фармони Президенти Ҷумҳурии Тоҷикистон Эмомалӣ Раҳмон аз 31 январи соли 2020 эълон шудааст, бахшида шуда, ҳадафи он кашф намудани истеъдодҳои ҷавон бо тафаккури техникӣ, ба омӯзиши фанҳои математика, дақиқ ва табиӣ ҷалб намудани хонандагони мактабҳо нигаронида шудааст. Дар олимпиадаи мазкур 27 дастаҳои олимпии наврасон бо шумораи 158 нафар хонандагон ва 28 мураббӣ аз давлатҳои Тоҷикистон, Қирғизистон, Узбекистон, Беларус, Афғонистон, Туркманистон ва Федератсияи Русия иштирок менамоянд.

Инчунин хонандагон аз давлатҳои Озарбойҷон, Муғулистон, Ҳиндустон, Шри-ланка, Чин, Сурия ва Куба бо теъдоди 20 даста, ки шумораи онҳо 134 нафарро ташкил медиҳанд ба тариқи фосилавӣ дар олимпиадаи мазкур ширкат меварзанд.

Соли гузашта чунин олимпиада аз 1 то 10 июл дар Русия баргузор шуд, ки дар он иштирокчиёни тоҷик дар шакли фосилавӣ ҷойҳои 2 ва 3-юмро гирифтанд.

АКС аз манбаҳои боз