Дар Душанбе масъалаи содагардонии расмиёти савдо баррасӣ шуд

ДУШАНБЕ, 02.06.2022 /АМИТ «Ховар»/. Масъалаҳо вобаста ба татбиқи супоришҳои қаблии Кумитаи ҳамоҳангсоз оид ба содагардонии расмиёти савдо /КҲСРС/  раванди амалигардонии «Реҷаи гармӣ», инчунин мушкилот дар самти дастрас намудани рухсатнома барои воридшавӣ ва хориҷшавии воситаҳои нақлиёти боркаш дар ҷаласаи чордаҳуми  КҲСРС, ки таҳти раёстаи муовини Вазири рушди иқтисоди кишвар Абдураҳмон Абдураҳмонзода дар Душанбе доир гардид, баррасӣ шуданд. Дар ин бора АМИТ «Ховар» бо истинод ба Вазорати рушди иқтисод ва савдои ҷумҳурӣ хабар медиҳад.

Абдураҳмон  Абдураҳмонзода зикр намуд, ки мақсади асосии баргузор намудани ҷаласаҳои КҲСРС иҷрои саривақтӣ ва сифатноки дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар самти суръатбахшии корҳо ҷиҳати рақамикунонии иқтисоди миллӣ, рушди иқтисоди сабз ва содагардонии расмиёти савдо дар кишвар мебошад.

Дар кори ҷаласа миёни намояндагони мақомоти давлатӣ ва бахши хусусӣ муколамаи озод сурат гирифт. Зикр шуд, ки масъалаҳои баррасишаванда бевосита ба татбиқи ҳуҷҷатҳои стратегӣ ва рушди босуботи иқтисодии кишвар мусоидат менамоянд.

АКС: Вазорати рушди иқтисод ва савдои Ҷумҳурии Тоҷикистон