Абдулло Раҳмонзода: Ноогоҳию бетаҷрибагии бархе ҷавонон сабаби шомилшавии онҳо ба гурӯҳҳои ҷудоихоҳ мегардад

Июль 29, 2022 17:14

ДУШАНБЕ, 29.07.2022. /АМИТ «Ховар»/. Ноогоҳию бетаҷрибагии баъзе ҷавонон сабаб мегардад, ки онҳо ба доми ҳар гуна гурӯҳҳои ҷудоихоҳ ва таблиғгарони бегонамазҳаб уфтанд. Ба ин масъала, пеш аз ҳама, мо, насли калонсол бояд таваҷҷуҳи ҷиддӣ зоҳир кунем, онҳоро беназорат нагузорем, аз мушкилоташон сари вақт воқиф гашта, ба дардашон марҳам шавем. Барои тарбияи дуруст ва ба роҳи рост ҳидоят намудани онҳо мо -волидайн, муаллимон ва аҳли ҷомеа масъулем, иброз дошт Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Абдулло Раҳмонзода имрӯз зимни нишасти матбуотӣ.

Мавсуф изҳор дошт, ки таъмин намудани ҳуқуқу манфиатҳои ҷавонон дар давраи ҳассоси ҷаҳонишавӣ яке аз масъалаҳои мубрам ба ҳисоб рафта, дар маркази таваҷҷуҳи Ҳукумати Ҷумҳурии Тоҷикистон қарор дорад.

«Дар асоси ҳамкории Кумитаи кор бо ҷавонон ва варзиш бо Прокуратураи генералӣ, вазоратҳои корҳои дохилӣ, маориф ва илм, тандурустӣ ва ҳифзи иҷтимоии аҳолӣ, меҳнат, муҳоҷират ва шуғли аҳолӣ, Кумитаи дин, танзими анъана ва ҷашну маросим, телевизион ва радио ва кор бо занон ва оила доир ба пешгирии омилҳои номатлуби иҷтимоӣ миёни ҷавонон ва наврасон, аз қабили ҷинояткорӣ, терроризму экстремизм, шомилшавӣ ба ҳизбу ҳаракатҳои иртиҷоӣ, зӯроварӣ, худкушӣ ва суиқасд ба ҷони худ, танфурӯшӣ, хариду фурӯши инсон, ҳамзамон тарбияи ҷавонон дар рӯҳияи созандагиву бунёдкорӣ ва тарғиби идеологияи солим нақшаи чорабиниҳои муштарак таҳия гардида, барои иҷрои босифат ба сохторҳои маҳаллии кумита ирсол мегардад»,- гуфт ӯ.

Зикр гардид, ки дар баробари ин моро мебояд баҳри пешгирии ҷавонон аз шомилшавӣ ба гурӯҳҳои ифротгаро ва тундрав ва бо мақсади баланд бардоштани маърифати сиёсиву ҳуқуқии онҳо роҳу усулҳои нави таъсиррасониро ба роҳ монем. Дар ин миён Кумита баҳри амалӣ намудани ин мақсад бояд аз механизму усулҳои нави таъсиррасон, ки фазои холигии ҷавононро пурра менамоянд, кор гирад.

Дар ҷараёни нишаст зикр шуд, ки Кумитаи кор бо ҷавонон барои дар рӯҳияи хештаншиносию худогоҳӣ тарбия намудани ҷавонон дар ҳама шаҳру ноҳияҳои мамлакат мусобиқаи футбол миёни ҷавонон бо усули деҳа ба деҳа ва маҳалла ба маҳалла доир менамояд. Инчунин бо ҷавонон хониши сиёсӣ ва корҳои фаҳмондадиҳӣ вобаста ба масъалаҳои марбута доир мекунад.

Имрӯзҳо барои муттаҳидсозии ҷавонони ҷумҳурӣ ҳамоиши бошукӯҳи «Дӯст ояд гарм дар оғӯш гир!» ҷараён дорад, ки он баҳри васеъ намудани ҷаҳонбинии ҷавонон, шинос шудан бо фарҳанги ниёгон, урфу одат ва меҳмоннавозии халқи тоҷик, маданияти шаҳрдорӣ, дӯстии ҷавонон, тарбия намудани ҷавонон дар рӯҳияи ватандӯстӣ ва арҷгузорӣ ба арзишҳои миллию таҳкими сулҳу суботи кишвар мусоидат мекунад.

Зарангези ЛАТИФ,
АМИТ «Ховар»

АКС: АМИТ «Ховар»

 

Июль 29, 2022 17:14

Хабарҳои дигари ин бахш

Маркази тадқиқоти стратегӣ ва ЮНИСЕФ вобаста ба пажуҳиши осебпазирӣ ва хатарҳои мансуб ба наврасон ҳамкорӣ менамоянд
Дар Хуҷанд даври шаҳрии Озмуни ҷумҳуриявии «Кадбонуи беҳтарин» баргузор гардид
МАДАНИЯТИ ШАҲРНИШИНӢ. Дар Хатлон нисбат ба онҳое, ки сабабгори ифлосшавии муҳити зист мегарданд, тадбирҳои қонунӣ меандешанд
Дар Душанбе таҷрибаи мусбати ҳамкории коршиносии минтақавӣ ва густариши он баррасӣ шуд
Дар Кумитаи ҳолатҳои фавқулода ва мудофиаи граждании Тоҷикистон бо намояндагони якчанд ниҳоди хориҷӣ мулоқот доир шуд
Дар Хатлон дар самти ҳифзи сирри давлатӣ ва ҳифзи техникии иттилоот конференсияи минтақавӣ баргузор гардид
Дар шаҳри Гулистон озмуни «Кадбонуи беҳтарин» баргузор шуд
ГРАНТИ ПРЕЗИДЕНТИ ТОҶИКИСТОН ДАР СОЛИ 2024. Вазорати меҳнат, муҳоҷират ва шуғли аҳолӣ ҳунармандонро барои дарёфти ин грант ба озмун даъват менамояд
Вазири адлияи Тоҷикистон ва Ёвари Дабири кулли Созмони Милали Муттаҳид густариши ҳамкории дуҷонибаро баррасӣ намуданд
Дар ҳудуди Хадамоти зидди жола ду бино ба истифода дода шуд
Вазорати меҳнат, муҳоҷират ва шуғли аҳолӣ ҷиҳати дарёфти гранти Президенти Ҷумҳурии Тоҷикистон барои дастгирии ҳунармандон озмун эълон менамояд
Ҷавонони Тоҷикистон барои иштирок дар Фестивали ҷаҳонии ҷавонон ба шаҳри Сочи мераванд