ФУТБОЛ. Имрӯз миёни дастаҳои ҷавонони Лигаи олӣ мусобиқаи Ҷоми «Ҷавонӣ» оғоз мешавад

ДУШАНБЕ, 07.07.2022 /АМИТ «Ховар»/. Имрӯз мусобиқаи футбол миёни дастаҳои ҷавонони Лигаи олӣ — Ҷоми «Ҷавонӣ» оғоз мешавад, хабар медиҳад шореҳи варзиши АМИТ «Ховар» бо истинод ба Федератсияи футболи Тоҷикистон.

Мусобиқаи мазкур дар ду марҳила — пешакӣ ва ниҳоӣ баргузор мегардад. Дар марҳилаи пешакӣ, ки аз 7 то 24 июл баргузор мегардад, дастаҳо ба ду гурӯҳ тақсим мешаванд. Дар минтақаи Суғд чаҳор даста барои ягона роҳхат ба қисми ниҳоӣ — «Хуҷанд»-и шаҳри Хуҷанд, «Эсхата»-и шаҳри Хуҷанд, «Истаравшан»-и шаҳри Истаравшан ва «Равшан»-и ноҳияи Зафаробод миёни ҳам мубориза мебаранд.

Дар минтақаи Душанбе бошад шаш даста – «Истиқлол»-и шаҳри Душанбе, «Регар-ТадАЗ»-и шаҳри Турсунзода, «Равшан»-и шаҳри Кӯлоб, «Хатлон»-и шаҳри Бохтар, «Файзканд»-и ноҳияи Восеъ ва КМВА-и шаҳри Душанбе баромад мекунанд. Се даста аз минтақаи Душанбе ва ғолиби минтақаи Суғд ба қисми ниҳоии мусобиқа роҳ меёбанд.

Ғолибони бозиҳои 1/2 ниҳоӣ дар финал бозӣ мекунанд ва дастаҳои мағлубшуда дар бозӣ барои ҷойи сеюм миёни ҳам вомехӯранд.

Мавриди зикр аст, ки фонди ҷоизавии Ҷоми «Ҷавонӣ» 60 ҳазор сомониро ташкил медиҳад. Ғолиби мусобиқа 30 ҳазор сомонӣ, дастаи ҷои дуюм 20 ҳазор сомонӣ ва барандаи медали биринҷӣ 10 ҳазор сомонӣ мукофотпулӣ хоҳад гирифт

Акс: ФФТ