Зиёда аз 300 шаҳрванди хориҷиро аз Қазоқистон ихроҷ намуданд

ДУШАНБЕ, 28.07.2022 /АМИТ «Ховар»/. Дар Алмаато 310 шаҳрванди хориҷӣ аз Қазоқистон ихроҷ шудаанд. Дар ин бора АБИ «Казинформ» бо истинод ба Polisia.kz хабар додааст.

Аз аввали сол дар шаҳри Алмаато 15 ҳазору 904 ҳодисаи нақзи қонунгузории муҳоҷирати Ҷумҳурии Қазоқистон ошкор гардидаанд. Дар 4182 ҳолат шаҳрвандони хориҷӣ ба ҷавобгарӣ кашида шуданд. «Тибқи ҳукми суд 310 шаҳрванди хориҷӣ аз қаламрави Ҷумҳурии Қазоқистон ихроҷ карда шуда, 673 нафар шаҳрвандони хориҷӣ, ки ҳуҷҷатҳои тасдиқкунандаи шахсияти худро надоранд, дар қабулгоҳи шуъбаи корҳои дохилӣ ҷойгир карда шуданд.

Дар 6 моҳи соли равон аз ҷониби  шахсони воқеӣ 34 162 иҷозатномаи кор ба муҳоҷирони меҳнатӣ дода шудааст. Вазифаи аввалиндараҷаи мо боздоштани роҳҳои муҳоҷирати ғайриқонунӣ ва ихроҷи шаҳрвандони хориҷӣ бо тартиби шаҳрвандӣ мебошад», — иброз намуд сардори шуъбаи хадамоти муҳоҷирати шаҳри Алмаато Асхат Бутунчинов.

Дар ниҳод ҳамчунин иттилоъ доданд, ки аз аввали сол дар шаҳри Алмаато ду чорабинии ҷумҳуриявии фаврӣ-пешгирикунандаи «Муҳоҷир» ва «Нелегал» гузаронида шуданд.

АКС: polisia.kz