Агентии назорат дар соҳаи маориф ва илм фаъолияти 7 муассисаи таълимиро қатъ намуд

Август 2, 2022 13:32

ДУШАНБЕ, 02.08.2022. /АМИТ «Ховар»/. Агентии назорат дар соҳаи маориф ва илми назди Президенти Ҷумҳурии Тоҷикистон фаъолияти 7 муассисаи таълимиро, ки ба талаботи стандартҳои соҳаи маориф ҷавобгӯ набуданд, боздошт ва қатъ намуд, иттилоъ дод Директори агентӣ Икром Субҳонзода имрӯз зимни нишасти матбуотӣ ба хабарнигорон.

«Аз ҷумла, Мактаби хусусии Мирзо Ҳасанзода дар ноҳияи Мастчоҳ, Муассисаи ғайридавлатии таълимии «Ояндаи дурахшон» дар шаҳри Бӯстон, ҶДММ «Ҳисор», ҶДММ «Хонаи британиягӣ» (кӯдакистон) дар шаҳри Душанбе, Маркази таълимии «Чароғи дониш» дар шаҳри Душанбе, Ташкилоти ҷамъиятии хайриявии «Сафои Ватан» дар шаҳри Душанбе ва ихтисосҳои тиббии Муассисаи таълимии ғайридавлатии «Коллеҷи техникии шаҳри Хуҷанд» дар асоси қарори мушовараи агентӣ боздошт ва қатъ карда шуданд», — гуфт Икром Субҳонзода.

Мавсуф зикр намуд, ки дар шашмоҳаи аввали соли равон масъулини раёсату шуъбаҳои агентӣ 523 аттестатсияи давлатӣ, 306 акредетатсияи давлатӣ, 13 азнавбарасмиятдарорӣ ва 125 ташхиси иҷозатномадиҳии муассисаҳои таълимиро ба анҷом расониданд.

«Натиҷаи санҷиши сатҳи муассисаҳои таълимии мамлакат маълум намуд, ки дар муқоиса ба солҳои қаблӣ дар самти асосҳои меъёрии ҳуқуқӣ, мустаҳкам намудани заминаи моддию техникӣ ва таъминоти кадрии муассисаҳои таълимӣ, ки омили асосии баландбардории сифати таҳсилот маҳсуб мешаванд, тағйироти мусбат ба мушоҳида мерасад», — афзуд директори агентӣ

Тибқи нақшаи кории агентӣ, дар шаш моҳи соли 2022 ҷиҳати муайян намудани сифати таҳсил ва сатҳи донишазхудкунии хонандагону донишҷӯён дар 515 муассисаи таълимӣ санҷиши сатҳи сифати таҳсил гузаронида шуд, ки нисбат ба шашмоҳаи якуми соли 2021 16 муассиса зиёд мебошад.

Дар ин давра сатҳи донишазхудкунии хонандагон дар 471 муассисаи таҳсилоти умумии санҷидашудаи ҷумҳурӣ дар маҷмӯъ 76,8 фоиз ва сифати таҳсил 32,9 ва дар муассисаҳои ғайридавлатии таълимӣ ва дорои мақоми ҷумҳуриявии санҷидашуда сатҳи донишазхудкунии хонандагон 79,3 фоиз ва сифати таҳсил 47 фоизро ташкил додааст.

Ёдовар мешавем, ки Асосгузори сулҳу ваҳдати миллӣ – Пешвои миллат муҳтарам Эмомалӣ Раҳмон зимни ироаи Паёми навбатӣ ба Маҷлиси Олии мамлакат (21 декабри соли 2021) аз сатҳу сифати таҳсил дар муассисаҳои таълимии ҷумҳурӣ изҳори нигаронӣ намуда, иброз доштанд, ки «бо вуҷуди он ки раванди таҳсил дар муассисаҳои таълимӣ ба низоми муайян даромадааст, зарур аст барои боз ҳам баланд бардоштани сатҳу сифати таҳсилот, омода кардани кадрҳои баландихтисос, омӯхтани забони давлатӣ, таъриху фарҳанги бостонии халқи тоҷик, боло бурдани завқу рағбати хонандагон ба омӯзиши фанҳои риёзӣ, дақиқ, табиӣ, технологияҳои иттилоотӣ ва аз худ кардани забонҳои хориҷӣ, махсусан забонҳои русиву англисӣ таваҷҷуҳи аввалиндараҷа зоҳир карда шавад.

Бо ин мақсад роҳбарони муассисаҳои таълимиро зарур аст, ки ба масъалаҳои баланд бардоштани сатҳи дониш ва касбияти омӯзгорон дар ҳамаи зинаҳои таҳсилот, бахусус, омӯзгорони муассисаҳои таҳсилоти ибтидоиву миёнаи касбӣ, такмили ихтисосу бозомӯзӣ ва тарбияи омӯзгорони ҷавони баландихтисос ва ба талаботи замона ҷавобгӯ дар ҳамаи зинаҳои таҳсилот эътибори аввалиндараҷа диҳанд», — изҳор намуданд Сарвари давлат.

Зарангези ЛАТИФ,
АМИТ «Ховар»

АКС: АМИТ «Ховар»

Август 2, 2022 13:32

Хабарҳои дигари ин бахш

Ҷашни Наврӯзи хуҷастапайро аҳли илму маориф ботантана ҷашн гирифтанд
Дар шаҳри Турсунзода кӯдакистони замонавӣ ба истифода дода шуд
Дар Донишгоҳи давлатии Хуҷанд озмуни «Шоҳномахонӣ» баргузор шуд
Дар шаҳри Истаравшан дуюмин ҳамоиши гирандагони стипендияи президентӣ доир шуд
«НАВРӮЗ — МУЖДАИ БАҲОРУ САРСАБЗИИ ТАБИАТ». Дар Донишгоҳи давлатии Кӯлоб ҷашни аҷдодиро таҷлил намуданд
НАВРӮЗ-ЭҲЁГАРИ АНЪАНАҲОИ МИЛЛӢ ВА ТАРҒИБГАРИ ҲУНАРҲОИ МАРДУМӢ. Таҳти ин унвон дар Донишгоҳи давлатии Бохтар ҳамоиш баргузор шуд
Дар Донишгоҳи давлатии ҳуқуқ, бизнес ва сиёсати Тоҷикистон оид ба ҳифзи Ватан ва мубориза бо падидаҳои номатлуб мулоқот доир шуд
Дар Филиали Донишгоҳи давлатии Москва дар шаҳри Душанбе конференсияи байналмилалии илмӣ-амалии «Геология дар макон ва замон» доир шуд
Устодону донишҷӯёни Донишгоҳи миллии Тоҷикистон Наврӯзро бо барномаи рангину намоиши анъанаҳои миллӣ таҷлил намуданд
Дар Тошканд Форуми ректорони донишгоҳҳои Тоҷикистон ва Узбекистон гузаронида мешавад
Дар Донишгоҳи миллӣ оид ба баланд бардоштани донишу маърифати ҳуқуқии ҷавонон ҳамоиш доир шуд
Бахшида ба Рӯзи байналмилалии ҳифзи пиряхҳо дар Донишгоҳи миллии Тоҷикистон ҳамоиш доир шуд