ҶОМИ ДЭВИС. Ҳайати дастаҳои марҳилаи гурӯҳии бонуфузтарин мусобиқоти сатҳи ҷаҳонӣ оид ба теннис маълум шуд

Август 27, 2022 15:16

ДУШАНБЕ, 27.08.2022 /АМИТ «Ховар»/. Теннисбозони тоҷик дар марҳилаи гурӯҳии 110-умин Ҷоми Дэвис — 2022 (Davis Cup Finals) дар гурӯҳи «В», ки бозиҳои он дар шаҳри Исо-Таун (Isa Town, Баҳрайн) аз 17 то 22 октябри соли ҷорӣ баргузор мешаванд, ширкат мекунанд, хабар медиҳад АМИТ «Ховар» бо истинод ба Федератсияи байналмилалии теннис (ITF).

Ба ҳайати дастаи Тоҷикистон Сомон Амонов, Иссамҷон Шарифов, Фирӯз Муҳиддинов ва Бахтиёр Исроилов шомил гардиданд.

Гурӯҳи «В» дар минтақаи IV Осиё/Океания аз дастаҳои Баҳрайн, Бутан, Камбоҷа, Гуам, Кувайт, Лаос, Муғулистон, Сингапур, Тоҷикистон ва Туркманистон иборат аст.

Марҳилаи гурӯҳии даври ниҳоии Ҷоми Дэвис бори нахуст дар чаҳор шаҳри мухталиф баргузор мешавад. Аз ҳар гурӯҳ ду дастаи беҳтарин ба даври чаҳорякниҳоӣ роҳ меёбанд. Ғолиби гурӯҳ дар даври плей-офф бозӣ карда, муайян мекунад, ки кадом кишвар аз гурӯҳ роҳхат мегирад. Бозиҳои плей-офф аз 23 то 27 ноябри соли 2022 дар Малагаи Испания баргузор мегарданд.

Ҷоми Дэвис (Davis Cup) бузургтарин мусобиқаи байналмилалӣ оид ба теннис байни мардон буда, ҳамасола аз соли 1900 ва аз соли 1979 инҷониб таҳти сарпарастии Федератсияи байналмилалии теннис баргузор мешавад. Дастаҳои теннисбозони кишварҳои гуногун бо ҳамдигар бозӣ намуда, дастаҳои мағлубшуда аз мусобиқа хориҷ мешаванд.

Бозиҳои Ҷоми Дэвис дар давоми сол баргузор гардида, бозиҳои аввали гурӯҳи интихобӣ дар моҳи январ оғоз мешаванд ва финал одатан дар моҳи ноябр доир мегардад. Дар ҳар даври мусобиқот ду дастаи миллӣ дар давоми се рӯз, маъмулан аз ҷумъа то якшанбе панҷ бозӣ анҷом медиҳанд.

Ҷоми Дэвис таърихи ҷолиб дорад: соли 1899 чор донишҷӯи Донишгоҳи Ҳарвард пешниҳод карданд, ки мусобиқа байни дастаҳои миллӣ баргузор шавад. Яке аз онҳо Дуайт Дэвис нақшаи баргузории мусобиқотро таҳия карда, инчунин бо маблағҳои худ ҷоиза барои чемпионҳо як ҷоми нуқрагӣ харидааст. Ин ғоя аллакай дар соли 1900, вақте дастаҳои Иёлоти Муттаҳидаи Амрико ва Британияи Кабир байни худ бозӣ мекарданд, ба воқеият табдил ёфт. Худи ташкилкунанда дар дастаи ИМА бозӣ карда, барои ба даст овардани ғалаба кумак намуд.

Ҳоло даҳҳо кишвари ҷаҳон дар Ҷоми Дэвис ширкат меварзанд. Дастаи мунтахаби Тоҷикистон аз соли 1997 дар Ҷоми Девис ишитрок мекунад ва 13 мавсимро дар он сипарӣ намудааст. Мунтахаби Тоҷикистон натиҷаи беҳтаринро дар соли 2013 ба даст овард.

Ғолиби мусобиқаи қаблии 109-умин Ҷоми Дэвис дар моҳи ноябри соли 2021 дар Мадрид (бори сеюм дар таърих) дастаи Русия буд. Имсол варзишгарони Русия ба далели таҳримҳо дар мусобиқа ширкат намекунанд.

АКС аз бойгонӣ

Август 27, 2022 15:16

Хабарҳои дигари ин бахш

ДЗЮДО. Дар Душанбе Чемпионати Тоҷикистон байни калонсолон баргузор мешавад
ФУТБОЛ. Дастаи мунтахаби ҷавонони Тоҷикистон бозиро бо дастаи ЛКС-и Лаҳистон мусовӣ кард
ҶОМИ ОСИЁ-2023. Футболбозони ҷавони тоҷик имрӯз бо дастаи ЛКС-и Лаҳистон бозии санҷишӣ анҷом медиҳанд
РАМЗИ УМЕДВОРӢ. Федератсияи дзюдои Тоҷикистон нишони нави худро пешниҳод кард
ЧЕМПИОНАТИ CAFA-2023. Дастаи мунтахаби занонаи футзали Тоҷикистон бар дастаи Қирғизистон пирӯз шуда, мақоми сеюмро гирифт
ЧЕМПИОНАТ ОИД БА ГӮШТИН БАЙНИ КАЛОНСОЛОН. Ғолибони он ба дастаи миллии Тоҷикистон шомил мешаванд
Дар Тоҷикистон барои рушди гӯштини миллӣ барнома ва санадҳои дахлдор таҳия мегарданд
Федератсияи байналмилалии гӯштингирии Тоҷикистон дар Русия, Эрон ва Ҳиндустон намояндагиҳояшро ифтитоҳ намуд
Имрӯз дар Душанбе Чемпионати Тоҷикистон оид ба гӯштин оғоз мегардад
ҶОМИ ФФТ-2023: бозиҳои даври аввали марҳилаи муқаддамотӣ дар минтақаи Душанбе баргузор шуданд
ФУТБОЛ. Мунтахаби ҷавонони Тоҷикистон (U-20) дар Туркия бо дастаи «Бухоро» бозии санҷишӣ анҷом дод
Федератсияи гӯштингирии Тоҷикистон дар Швейтсария ҳамчун Федератсияи байналмилалии гӯштингирӣ сабти ном карда шуд