Бозиҳои Делфии ҷавонони давлатҳои аъзои ИДМ дар Тоҷикистон бо иштироки 600 нафар доир мегардад

ДУШАНБЕ, 17.09.2022 /АМИТ «Ховар»/. Аз 14 то 18 октябр бори аввал дар Тоҷикистон Бозиҳои XVI-уми Делфии ҷавонони давлатҳои аъзои Иттиҳоди Давлатҳои Мустақил бо иштироки 600 нафар аз рӯи нӯҳ номина баргузор мегардад.

Тавре дар маркази матбуотии Вазорати фарҳанги мамлакат ба АМИТ «Ховар» иттилоъ доданд, Бозиҳои XVI-уми Делфӣ аз рўи нӯҳ номина, яъне фортепиано, скрипка, санъати тасвирӣ, созҳои нафасӣ, сарояндаи академӣ, анъанавӣ, эстрадӣ, рақси халқӣ ва аксбардорӣ дар муассисаҳои фарҳангии шаҳри Душанбе доир мешавад.

Бо мақсади тақвият бахшидани корҳои омодагиву тадорукотӣ ва дар сатҳи баланд доир намудани ин чорабинии байналмилалии фарҳангӣ аз ҳисоби кормандони дастгоҳи марказии вазорат, ҳайати эҷодиву маъмурӣ ва аз ҳисоби мутахассисони соҳа ситоди корӣ ташкил карда мешавад. Ситоди кории чорабинӣ бо мақсади баррасӣ ва ҳалли саривақтии масъалаҳои вобаста ба омодагии чорабинии мазкур фаъолияти худро ба роҳ монда, ҳар ҳафта ҷаласаи корӣ доир менамояд.

Ёдовар мешавем, ки масъули баргузории ин чорабинии байналмилалӣ Вазорати фарҳанги Ҷумҳурии Тоҷикистон ва Кумитаи байналмилалии Бозиҳои Делфӣ буда, тартиб ва Низомномаи баргузории Бозиҳо дар сомонаи расмии Вазорат ва сомонаи Кумита ҷой дода шудааст.

АКС:  Вазорати фарҳанги ҶТ