Дар Ню-Йорк ташаббусҳои ҷаҳонии Президенти Тоҷикистон оид ба ҳифзи пиряхҳо баррасӣ шуданд

ДУШАНБЕ, 20.09.2022 /АМИТ «Ховар»/. 19 сентябр дар ҳошияи «Ҳафтаи сатҳи баланд»-и иҷлоси 77-уми Маҷмаи Умумии СММ дар шаҳри Ню-Йорк вохӯрии Вазири корҳои хориҷии Ҷумҳурии Тоҷикистон Сироҷиддин Муҳриддин бо намояндаи олии Гурӯҳи кишварҳои тараққикардаи маҳсур дар хушкӣ, кишварҳои камтараққикарда ва кишварҳои хурди ҷазиравӣ Рабаб Фатима доир гардид. Дар ин бора ба АМИТ «Ховар» дар Вазорати корҳои хориҷии Ҷумҳурии Тоҷикистон хабар доданд.

Мусоҳибон атрофи масъалаҳои ҳамкорӣ миёни Тоҷикистон ва Гурӯҳи кишварҳои тараққикардаи маҳсур дар хушкӣ дар самти обу энергетика, нақлиёт ва дастоварду мушкилоти иҷтимоӣ, иқтисодӣ ва экологии ин кишварҳо, инчунин татбиқи лоиҳаҳои бузурги минтақавӣ мубодилаи афкор намуданд.

Дар ин росто, Сироҷиддин Муҳриддин ташаббуси ҷаҳонии Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро оид ба эълон намудани соли 2025 ҳамчун Соли байналмилалии ҳифзи пиряхҳо ва таъсиси Хазинаи байналмилалии ҳифзи пиряхҳо дар назди СММ махсус таъкид кард.

Бояд тазаккур дод, ки Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон 3 марти соли 2021 зимни суханронӣ дар мулоқоти якуми Панели сатҳи баланд оид ба масъалаҳои об ва иқлим дар сиғаи видеоконференсия пешниҳод намуданд, ки соли 2025-ум Соли байналмилалии ҳифзи пиряхҳо эълон гардида, санаи Рӯзи ҷаҳонии ҳифзи пиряхҳо муайян карда шавад.

Қобили зикр аст, ки бори аввал соли 2009 Президенти Тоҷикистон Эмомалӣ Раҳмон аз минбари Конфронси байналмилалӣ оид ба тағйирёбии иқлим дар Копенгаген зарурати таъсиси Хазинаи байналмилалии ҳифзи пиряхҳоро пешниҳод карда буданд.

Акс: ВКХ ҶТ