Дар Палатаи ҳисоби Тоҷикистон рушди низоми пардохтҳои ғайринақдиро баррасӣ карданд

ДУШАНБЕ, 10.09.2022 /АМИТ «Ховар»/. Дар Палатаи ҳисоби Ҷумҳурии Тоҷикистон дар мавзӯи «Пардохтҳои ғайринақдӣ» ва «Қарзҳои ғайринақдии овердрафтӣ» машғулияти омӯзишӣ баргузор шуд, хабар медиҳад АМИТ «Ховар» бо истинод ба Палатаи ҳисоб.

Дар машғулият муовини Раиси Палатаи ҳисоб Файзалӣ Аҳмадзода, намояндагони Бонки давлатии амонатгузории Ҷумҳурии Тоҷикистон «Амонатбонк» ва доираи васеи кормандони палата иштирок намуданд.

Сардори идораи стратегия, таҳлил ва ҷамъбасти БДА «Амонатбонк» Абдураҳмон Наҷмиддинзода дар робита ба рушди низоми пардохтҳои ғайринақдӣ дар иқтисодиёти мамлакат, вусъат додани истифодаи воситаҳои электронии пардохтӣ ҳангоми ҳисоббаробаркуниҳо, инчунин мутобиқ будани фаъолияти хизматрасониҳои бонкӣ ба талаботи замон афзуд, ки то имрӯз «Амонатбонк» зиёда аз 300 намуди хизматрасониро барои мизоҷон роҳандозӣ намудааст. Ҷиҳати пешниҳоди хизматрасониҳои босифат бо истифода аз технологияҳои рақамӣ ва гузариши пурра ба ҳисоббаробаркунии ғайринақдӣ аз ҷониби «Амонатбонк» пешниҳоди хизматрасонии овердрафтӣ ва замимаи мобилии «Амонат мобайл» ба дорандагони кортҳои пардохтии бонкӣ бо шартҳои имтиёзнок роҳандозӣ гардидааст.

Мудири департаменти қарздиҳии БДА «Амонатбонк» Шамил Иззатзода дар мавзӯи «Қарзҳои ғайринақдии овердрафтӣ» маърӯза намуда, гуфт, ки «овердрафт» (изофапардохт, пешпардохт) — қарзи кӯтоҳмуддат барои амалӣ намудани пардохтҳои аз маблағи дар суратҳисоббудаи муштарӣ зиёдтар аст, ки дар ҳудуди маблағ ва шартҳои шартномаи пешниҳоди корт муайян гаштаанд.

Зикр шуд, ки қарзҳои овердрафтӣ бе зомин ва гарав пешниҳод карда шуда, 1,8% меъёри фоизи моҳонаи қарз буда, ҳаҷми қарз дар доираи то 80 фоизи маблағи музди меҳнат ё нафақаи моҳонаи худ пешбинӣ шудааст. Ҳамзамон муҳлати амали шартнома то 36 моҳ дар намуди хати қарзии барқароршаванда амалӣ мегардад.

АКС: Палатаи ҳисоби Ҷумҳурии Тоҷикистон