Дар Берлин густариши равобити дуҷонибаи Тоҷикистону Олмон ва вазъ дар Осиёи Марказӣ баррасӣ гардид

 ДУШАНБЕ, 20.10.2022 /АМИТ «Ховар»/. 17 октябр Сафири Тоҷикистон дар Олмон Имомудин Сатторов бо Ваколатдори Вазорати федеролии корҳои хориҷии Олмон доир ба ҳамкорӣ бо кишварҳои Аврупои Шарқӣ, Қафқоз ва Осиёи Марказӣ Маттиас Люттенберг вохӯрӣ анҷом дод. Дар ин бора ба АМИТ «Ховар» дар Вазорати корҳои хориҷии Ҷумҳурии Тоҷикистон хабар доданд.

Ҳолати кунунии робитаҳои ҳасанаи дуҷониба ва таҳкими  ҳарчи бештари ҳамкории баъдӣ  миёни Тоҷикистон ва Олмон дар бахшҳои сиёсӣ, иқтисодӣ, фарҳангӣ, илму маориф, амният ва дигар масоили мавриди эҳтимоми тарафайн дар меҳвари ин гуфтугӯ қарор доштанд.

Ҳамчунин дар атрофи мавзӯъҳои мубрами минтақавию байналмилалӣ мубодилаи афкор сурат гирифт.

Имомудин Сатторов таваҷҷуҳи дипломати олмониро ба равандҳои минтақавӣ, минҷумла таниши ахир дар марзи Тоҷикистон ва Қирғизистон ҷалб карда, дар ин хусус таъкид дошт, ки Тоҷикистон ҷонибдори тариқи гуфтушунид ва бо роҳҳои дипломатӣ ҳал намудани муноқишаи сарҳадӣ буда, дар ҳамин мавқеъ устувор боқӣ мемонад.

АКС: ВКХ ҶТ