Дар Тоҷикистон мусобиқаи малакаҳои касбӣ тибқи талаботи Ташкилоти байналмилалии «World skills» доир мегардад

Октябрь 21, 2022 14:30

ДУШАНБЕ, 21.10.2022 /АМИТ «Ховар»/. Моҳи марти соли 2023 дар шаҳри Душанбе миёни Тоҷикистон ва Эрон мусобиқаи малакаҳои касбӣ тибқи талаботи Ташкилоти байналмилалии «World skills» доир мегардад. Ин матлаб зимни мулоқоти гурӯҳи кории Вазорати меҳнат, муҳоҷират ва шуғли аҳолии Ҷумҳурии Тоҷикистон бо Созмони омӯзиши фаннӣ ва ҳирфии Ҷумҳурии Исломии Эрон 19 октябр баён гардид.

Бояд гуфт, ки Ташкилоти байналмилалии «World skills» созмони байналмилалии ғайритиҷоратӣ буда, ҳадафи он баланд бардоштани мақом ва стандартҳои омодагии касбӣ ва тахассусӣ,  оммавӣ намудани касбҳои корӣ тавассути озмунҳои байналмилалӣ дар саросари ҷаҳон мебошад. Ташкилот соли 1946 таъсис ёфтааст.

Тавре дар маркази матбуоти Вазорати меҳнат, муҳоҷират ва шуғли аҳолии мамлакат ба АМИТ «Ховар» иттилоъ доданд, гурӯҳи кории Вазорати меҳнат, муҳоҷират ва шуғли аҳолии Ҷумҳурии Тоҷикистон таҳти роҳбарии муовини якуми вазир Абдулғаффор Раҳмонзода аз 17 то 19 октябр дар доираи густариши ҳамкорӣ ба Ҷумҳурии Исломии Эрон сафар намуд.

17 октябр дар Эрон ҷаласаи 2-юми гурӯҳи кори Вазорати меҳнат, муҳоҷират ва шуғли аҳолии Ҷумҳурии Тоҷикистон бо Вазорати таовун, кор ва рифоҳи иҷтимоии Ҷумҳурии Исломии Эрон ва касбии Ҷумҳурии Исломии Эрон оғои Ғуломҳусейн Ҳусейниниё доир гардид.

Дар ҷаласа масъалаҳо оид ба иҷрои Ёддошти тафоҳум миёни вазоратҳо ва нақшаи кории сесолаи ҳамкории вазоратҳо дар самтҳои касбомӯзӣ, шуғл ва ҳунаромӯзӣ, инчунин табодули таҷрибаи омӯзгорон, устоҳои таълими истеҳсолӣ, касбомӯзон, баргузории озмунҳои маҳорат, таъмини таҷҳизоти касбомӯзӣ оид ба ихтисосҳои қаннодӣ, таъмири автомобил, омӯзиши ҳунарҳои дастӣ, бахусус қолинбофии дастӣ мавриди баррасӣ қарор гирифтанд.

Дар доираи ҷаласа аз ҷониби муовини якуми Вазири меҳнат, муҳоҷират ва шуғли аҳолии Ҷумҳурии Тоҷикистон ва Раиси Созмони омӯзиши фаннӣ ва ҳирфии Ҷумҳурии Исломии Эрон Протокол ба имзо расонида шуд.

Дар доираи Протокол тарафҳо мувофиқати худро ҷиҳати баргузории таҷрибаомӯзии таълимиву истеҳсолӣ, таҳияи стандартҳои таълимӣ барои коршиносони Вазорати меҳнат, муҳоҷират ва шуғли аҳолии Ҷумҳурии Тоҷикистон, ҳамчунин барои устоҳои таълими истеҳсолӣ аз Ҷумҳурии Тоҷикистон аз рӯи ихтисосҳои қаннодӣ, ошпазӣ, нонпазӣ, коркарди чарм, кулолгарӣ ва кошинкорӣ, таъмири автомобилҳо, заргарӣ, дӯзандагиву тарроҳӣ ва касбу ҳунарҳои муосир изҳор намуданд.

Ҷониби эронӣ омодагии хешро барои дар шаҳри Душанбе муаррифӣ намудани таҷҳизот ва маводи таълимӣ-техникии ширкатҳои эронӣ, таҷрибаомӯзӣ ва коромӯзии ҳайати тоҷикистонӣ дар Эрон бо истифода аз таҷрибаи мактаби «Устод – шогирд» ва ба Вазорати меҳнат, муҳоҷират ва шуғли аҳолии Ҷумҳурии Тоҷикистон пешниҳод намудани на кам аз 1000 стандарти касбӣ-таълимӣ бо интихоби касбҳо тибқи талаботи бозори меҳнати дохил ва хориҷи Ҷумҳурии Тоҷикистон изҳор дошт.

Тарафҳо ба мувофиқа расиданд, ки таҷрибаи ташкили омӯзишгоҳҳои касбӣ-техникии хусусӣ, ки дар Эрон фаъолият доранд, омӯхта шуда, ҷаласаи сеюми Гурӯҳи кории муштарак моҳи марти соли 2023 дар шаҳри Душанбе баргузор карда шавад.

АКС: Вазорати меҳнат, муҳоҷират ва шуғлии аҳолии ҶТ

 

 

Октябрь 21, 2022 14:30

Хабарҳои дигари ин бахш

ҚОНУН «ДАР БОРАИ ТАРБИЯИ ВАТАНДӮСТИИ ШАҲРВАНДОН». Доир ба он байни хизматчиёни давлатӣ омӯзиш баргузор шуд
Табибони тоҷик дар Конгресси 17-уми осебшиносон-ортопедон дар Ҳиндустон иштирок намуданд
«Тоҷиксуғурта» соли гузашта дар ҳаҷми зиёда аз 5,8 миллион сомонӣ маблағи суғуртавӣ пардохт намуд
Соли 2022 барои таҷдиду барқарорсозии 42 иншооти оби нӯшокӣ беш аз 14 миллион сомонӣ ҷудо карда шуд
НИШАСТИ МАТБУОТӢ. Соли гузашта 770 ҳолати вайрон намудани Қонун «Дар бораи танзими анъана ва ҷашну маросим дар Ҷумҳурии Тоҷикистон» ба қайд гирифта шуд
ФАВРӢ! Роҳи мошингарди Душанбе-Чаноқ кушода шуд
Дар мақомоти Ваколатдор оид ба ҳуқуқи инсон лоиҳаи 50 санади меъёрии ҳуқуқӣ мавриди омӯзиш қарор гирифт
Маркази миллии қонунгузорӣ барои такмили механизми татбиқи қонунҳо беш аз 600 таклиф пешниҳод намуд
IRS ХАБАР МЕДИҲАД. Дар километрҳои аз 52 то 73-юми роҳи Душанбе-Чаноқ 45 тармаи хурду бузург фаромад
Соли 2022 дар Тоҷикистон номи 56 шаҳраку деҳот иваз карда шуд
Агентии обуҳавошиносӣ: «Соли гузашта 365 пешгӯиҳои якшабонарӯзӣ тартиб дода шуд, ки дурустии онҳо 93%-ро ташкил медиҳад»
ТАВАҶҶУҲ! Кумитаи ҳолатҳои фавқулода ва мудофиаи гражданӣ аз резиши сангу фаромадани тарма ҳушдор медиҳад