ЧҶ-2022. Дастаи мунтахаби Эрон пас аз бохт аз ИМА ба даври баъдии мусобиқа роҳ наёфт

ДУШАНБЕ, 30.11.2022 /АМИТ «Ховар»/. Дастаи мунтахаби Эрон пас аз бохт аз ИМА дар Чемпионати ҷаҳон оид ба футбол дар Қатар ба даври баъдии мусобиқа роҳ наёфт, иттилоъ медиҳад хабарнигори АМИТ «Ховар».

Бозӣ дар варзишгоҳи «Эл Тумама» дар Давҳа баргузор шуда, бо ҳисоби 0 бар 1 ба нафъи ИМА анҷом ёфт.

Дар баробари Эрон аз гурӯҳи «В» дастаи мунтахаби Уэлс низ, ки дар даври охири гурӯҳӣ аз Англия бо ҳисоби 0 бар 3 шикаст хӯрд, ба даври баъдӣ набаромад.

Аз ин гурӯҳ ба 1/8-финали Чемпионати ҷаҳон дастаҳои мунтахаби Англия ва ИМА роҳ ёфтанд.

Бояд тазаккур дод, ки Эрон ҳеҷ гоҳ то ба марҳилаи 1/8-финали Чемпионати ҷаҳон оид ба футбол нарасидааст. Дар Чемпионати ҷаҳонии соли 1998 «Палангҳои Форс» Иёлоти Муттаҳидаи Амрикоро бо ҳисоби 2-1 шикаст дода буданд.

ДАР АКС: Лаҳзаи задани гол ба дарвозаи Эрон. Акс аз манбаъҳои боз