Дар Маҷлиси намояндагон муҳокимаи парлумонӣ баргузор гардид

Ноябрь 17, 2022 14:20

ДУШАНБЕ, 17.11.2022 /АМИТ «Ховар»/. Имрӯз таҳти раёсати Раиси Маҷлиси намояндагони Маҷлиси Олии Ҷумҳурии Тоҷикистон Маҳмадтоир Зокирзода бо иштироки вакилони Маҷлиси намояндагон, роҳбарони якчанд вазорату кумитаҳои дахлдори мамлакат дар мавзӯи «Ҷараёни иҷрои Қонуни Ҷумҳурии Тоҷикистон «Дар бораи Буҷети давлатии Ҷумҳурии Тоҷикистон барои соли 2022» дар 9 моҳи соли 2022» муҳокимаи парлумонӣ доир гардид. Дар ин бора ба АМИТ «Ховар» котиби матбуоти Маҷлиси намояндагон Муҳаммадато Султонов хабар дод.

Аз рӯи масъалаи мазкур раиси кумитаи Маҷлиси намояндагон оид ба иқтисод ва молия Маҳмадалӣ Қурбонзода иброз намуд, ки таҳлилҳо нишон доданд, ки вазорату идораҳои ҷумҳурӣ ҷиҳати идоракунии самараноки молияи давлатӣ ва иҷрои сифатноки буҷети давлатӣ корҳои муайянеро ба анҷом расониданд.

Мутобиқи маълумоти оморӣ, ҳаҷми номиналии Маҷмӯи маҳсулоти дохилии ҷумҳурӣ дар моҳҳои январ — сентябри соли ҷорӣ ба 79,3 млрд сомонӣ ва суръати рушди воқеии он ба 7,8 фоиз баробар гардидааст.

Афзоиши Маҷмӯи маҳсулоти дохилӣ дар тамоми соҳаҳо ба назар мерасад. Аз ҷумла, ҳаҷми истеҳсоли маҳсулоти саноатӣ дар давраи ҳисоботӣ нисбат ба нуҳ моҳи соли гузашта 18,0 фоиз, ҳаҷми истеҳсоли маҳсулоти кишоварзӣ 7,8 фоиз, маблағгузорӣ ба сармояи асосӣ 17,0 фоиз, хизматрасонии пулакӣ дар ҳамаи соҳаҳои хизматрасонӣ 16,2 фоиз, мусофиркашонӣ 13,4 фоиз, гардиши савдо 11,1 фоиз ва гардиши савдои хориҷӣ 18,8 фоиз афзоиш ёфта, дар маҷмӯъ боиси таъмин гардидани рушди мусбати иқтисодиёти ҷумҳурӣ гардид.

Дар давраи ҳисоботӣ гардиши савдои хориҷии ҷумҳурӣ ба 5 миллиарду 410 миллион доллари амрикоӣ баробар гардид, ки нисбат ба ҳамин давраи соли гузашта 18,8 фоиз зиёд мебошад.

Дар ин давра музди миёнаи моҳона ба 1693,7 сомонӣ баробар гардида, нисбат ба ҳамин давраи соли гузашта 11,4 фоиз афзоиш ёфтааст.

Мусбат ҷамъбаст гардидани нишондиҳандаҳои макроиқтисодии кишвар имконият дод, ки нишондиҳандаҳои фискалӣ, аз ҷумла даромад, хароҷот ва касри буҷет низ дар сатҳи муътадил нигоҳ дошта шаванд.

Дар ин робита дар давраи ҳисоботӣ иҷрои нақшаи қисми даромади буҷети давлатӣ аз ҳисоби ҳамаи сарчашмаҳои воридот дар сатҳи 103,2 фоизи нақша таъмин ва ба буҷети давлатӣ 24,3 млрд сомонӣ ворид гардид.

Барзиёдии воридоти маблағҳо нисбат ба нақшаи тасдиқшуда 757,4 млн сомониро ташкил дод.

Ҳамин тавр, аз таҳлилҳо бармеояд, ки гарчанде нақшаи қисмҳои даромади буҷет дар 9 моҳи соли ҷорӣ иҷро гардида бошад ҳам, вале дар истифодаи мақсадноки маблағҳои буҷетӣ камбудиҳо ба назар мерасанд. Бинобар ин, вазорату идораҳои дахлдорро зарур аст, ки ҷиҳати бартараф намудани камбудиҳои мавҷуда тадбирҳои судманд андешанд.

Аз рӯи масъалаи рӯзномаи муҳокимаи парлумонӣ дар назди вакилони Маҷлиси намояндагон Вазири молияи Ҷумҳурии Тоҷикистон Файзиддин Қаҳҳорзода, муовини якуми Раиси Кумитаи андози назди Ҳукумати Ҷумҳурии Тоҷикистон Аюбҷон Собирзода, Сардори Хадамоти гумруки назди Ҳукумати Ҷумҳурии Тоҷикистон Хуршед Каримзода, Директори Агентии суғуртаи иҷтимоӣ ва нафақаи назди Ҳукумати Ҷумҳурии Тоҷикистон Дилмурод Давлатзода, муовини Раиси Палатаи ҳисоби Ҷумҳурии Тоҷикистон Файзалӣ Аҳмадзода, муовини Директори Агентии назорати давлатии молиявӣ ва мубориза бо коррупсия Сулаймон Талбакзода сухан гуфтанд.

Баъди музокираҳо дар фарҷоми муҳокимаи парлумонӣ тавсияҳо қабул карда шуданд.

Акс: МН МО ҶТ

 

Ноябрь 17, 2022 14:20

Хабарҳои дигари ин бахш

Оид ба иҷрои Қонуни конститутсионии Ҷумҳурии Тоҷикистон «Дар бораи мақомоти маҳаллии ҳокимияти давлатӣ» муҳокимаи парлумонӣ баргузор шуд
Дар Душанбе дурнамои ҳамкории Тоҷикистону Чин баррасӣ гардид
Иҷлосияи ҳаждаҳуми Маҷлиси миллии Маҷлиси Олии Ҷумҳурии Тоҷикистон, даъвати шашум баргузор гардид
Дар ҷаласаи Шурои Маҷлиси миллии Маҷлиси Олии Ҷумҳурии Тоҷикистон 39 масъала мавриди баррасӣ қарор дода шуд
Дар иҷлосияи Маҷлиси намояндагон Созишнома байни Ҳукумати Ҷумҳурии Тоҷикистон ва Ҳукумати Давлати Қатар ба тасвиб расид
Имрӯз иҷлосияи ҳаждаҳуми Маҷлиси миллии Маҷлиси Олии Ҷумҳурии Тоҷикистон, даъвати шашум баргузор мешавад
Пагоҳ иҷлосияи ҳаждаҳуми Маҷлиси миллии Маҷлиси Олии Ҷумҳурии Тоҷикистон, даъвати шашум баргузор мешавад
19 июн иҷлосияи ҳаждаҳуми Маҷлиси миллии Маҷлиси Олии Ҷумҳурии Тоҷикистон, даъвати шашум баргузор мешавад
19 июн иҷлосияи ҳаждаҳуми Маҷлиси миллии Маҷлиси Олии Ҷумҳурии Тоҷикистон, даъвати шашум баргузор мешавад
Дар ҷаласаи навбатии иҷлосияи панҷуми Маҷлиси намояндагони Маҷлиси Олии Ҷумҳурии Тоҷикистон вакил Саидҷаъфар Усмонзода аз ҳуқуқи дахлнопазирӣ маҳрум гардид
Вакили Маҷлиси намояндагон Саидҷаъфар Усмонзода аз ҳуқуқи дахлнопазирӣ маҳрум гардида, ба ҳабс гирифта шуд
Дабири кулли Машварати ҳамкорӣ ва тадбирҳои боварӣ дар Осиё бо раиси Комиссияи одоби вакилони Маҷлиси намояндагон мулоқот намуд