«БАРЪАКСИ ПЕШГӮИҲО». Хазинаи байналмилалии асъор гузориш дод, ки пайомадҳои Амалиёти махсуси ҳарбии Россия дар Украина «барои иқтисоди Тоҷикистон чандон ҷиддӣ набуданд»

Декабрь 27, 2022 14:07

ДУШАНБЕ, 27.12.2022 /АМИТ «Ховар»/. Пайомадҳои манфии Амалиёти махсуси ҳарбии Россия (АМҲ) дар Украина барои иқтисоди Тоҷикистон, баръакси пешгӯиҳо, чандон ҷиддӣ набуданд, аммо эҳтимол аст онҳо соли оянда ҷиддитар эҳсос шаванд. Дар ин бора АМИТ «Ховар» бо истинод ба гузориши Хазинаи байналмилалии асъор (ХБА) хабар медиҳад.

Ҳайати ин ниҳоди байналмилалии молӣ, ки чанде пеш дар Душанбе буд, 23 декабр гузоришеро дар бораи вазъи иқтисодии Тоҷикистон нашр кард.

«Пас аз афзоиши 9,2 % дар соли 2021, Маҷмӯи маҳсулоти дохилии (ММД) воқеӣ аз моҳи январ то октябр 8 % афзоиш ёфт, ки ин аз рушди васеи саноат (аз ҷумла, истихроҷи маъдан), кишоварзӣ ва сохтмон шаҳодат медиҳад. Баръакси интизориҳо, таъсири ҷанг дар Украина ба иқтисоди кишвар чандон назаррас набуд», — омадааст дар гузориш.

Коршиносони Хазина таъкид менамоянд, ки соли равон таваррум бо вуҷуди нисбатан гарон будани нархи ҷаҳонии маҳсулоти хом хуб нигоҳ дошта шудааст.

«Таварруми солона дар охири соли 2021 аз 8% то 4,5% дар моҳи ноябри соли 2022 (ин яке аз беҳтарин нишондиҳандаҳои ҷаҳон аст! – тавз. АМИТ «Ховар») коҳиш ёфт, ки аз ҳадафи миёнамуҳлати Бонки миллии Тоҷикистон (6 (±2)%) пасттар аст. Сиёсати қатъии пулию қарзӣ ба нигоҳдории фишорҳои таваррум мусоидат кард, дар ҳоле ки болоравии нархи ҷаҳонии маводи ғизоӣ ва сӯзишвории воридотӣ дар шашмоҳаи аввали соли ҷорӣ бо тақвияти қурби сомонӣ ва озод шудани захираҳои стратегии маводи ғизоӣ ба эътидол омад. Истеҳсоли маҳсулоти кишоварзӣ, ки ба истеъмоли дохилӣ нигаронида шудааст, нархи маҳсулоти ғизои маҳаллиро низ нигоҳ дошт», — омадааст дар гузориш.

Коршиносони ХБА изҳор доштанд, ки билофосила пас аз оғози Амалиёти махсуси ҳарбии Россия дар Украина моҳи феврал интиқоли пули муҳоҷирон ба Тоҷикистон коҳиш ёфт, вале баъдан дар семоҳаи дуюми соли равон башиддат боло рафт. Дар 10 моҳи ахир захираҳои арзии Тоҷикистон аз 2 миллиарду 500 миллион ба 3 миллиарду 400 миллион доллар афзоиш ёфт, ки барои пӯшонидани воридот дар ин муддат кофист.

Бино ба маълумоти Хазинаи байналмилалии асъор, бо вуҷуди пешрафти иқтисодӣ равшан нест, ки иқтисоди Тоҷикистон аз коҳишёбии афзоиши иқтисодии Россия, ки кишвари аслии мизбони муҳоҷирони корӣ ва шарики муҳими иқтисодӣ мебошад, чӣ қадар ва то кай эмин хоҳад монд.

Ёдовар мешавем, ки 23 декабри соли равон Президенти Тоҷикистон Эмомалӣ Раҳмон дар Паёми худ ба Парлумони кишвар яке аз аввалинҳо шуда, ба ин мавзӯъ дахл карда, таъкид доштанд, ки сарфи назар аз таҳаввулоти дар иқтисоди ҷаҳон идомадошта ва таъсири манфии омилҳои берунӣ ба иқтисоди миллии мо, дар натиҷаи татбиқи самараноки ислоҳоти иқтисодӣ, амалӣ намудани стратегияву барномаҳо ва тадбирҳои зиддибуҳронӣ дар панҷ соли охир рушди иқтисодиёти Тоҷикистон ҳамасола ба ҳисоби миёна дар сатҳи 7,3 фоиз таъмин гардида, маҷмӯи маҳсулоти дохилӣ аз 71 миллиард ба 115 миллиард сомонӣ расид ва ба ҳар сари аҳолӣ 1,5 баробар афзоиш ёфт.

«Аз ҷумла, соли 2022 корҳо ҷиҳати устувор нигоҳ доштани нишондиҳандаҳои макроиқтисодӣ, коҳиш додани таъсири хавфҳои эҳтимолӣ ба иқтисоди миллӣ, фаъолияти босуботи низоми бонкӣ, афзоиши истеҳсоли маҳсулоти саноативу кишоварзӣ, беҳтар гардонидани фазои сармоягузорӣ ва дастгирии соҳибкорӣ тақвият пайдо карда, рушди иқтисоди миллӣ дар сатҳи 8 фоиз таъмин карда шуд», — зикр намуданд Сарвари давлат

Тавре Пешвои миллат борҳо таъкид карданд, ҳадафи олии давлат ва Ҳукумати мамлакат мунтазам баланд бардоштани сатҳу сифати зиндагии мардуми азизамон мебошад. «Дар робита ба ин, Ҳукумати мамлакатро зарур аст, ки пешрафти устувори минбаъдаи иҷтимоиву иқтисодии кишварро нигоҳ дошта, соли 2023 суръати рушди иқтисодиро дар сатҳи на кам аз 8 фоиз таъмин намояд», — тазаккур доданд Эмомалӣ Раҳмон

АКС аз бойгонӣ

Декабрь 27, 2022 14:07

Хабарҳои дигари ин бахш

Сарвари давлат Эмомалӣ Раҳмон аз вазъи барҳамхӯрӣ ва аз фаъолият мондани корхонаҳои саноатӣ дар вилояти Суғд изҳори нигаронӣ намуданд
Дар Душанбе ҷаласаи 18-уми Кумитаи ҳамоҳангсоз оид ба содагардонии расмиёти савдо баргузор гардид
Барои ифротӣ нагаштани ҷавонон таваҷҷуҳи онҳоро ба илму дониш ва касбу ҳунаромӯзӣ бояд ҷалб намуд
Масъулини вилояти Суғд баҳри ҳалли мушкилоти пойгоҳҳои обкашӣ ва норасоии обёрии замин вазифадор гардиданд
Лоиҳаи «Ташхиси сохтори бозори пул дар Ҷумҳурии Тоҷикистон» баррасӣ гардид
Дар оянда байни Душанбе ва Сеул роҳи ҳавоӣ кушода мешавад
8 АПРЕЛ-РӮЗИ ИҚТИСОДЧИЁН. Созмонҳои бонуфузи байналмилалии молиявӣ Тоҷикистонро давлати дорои суръати баланди рушди иқтисодӣ арзёбӣ намудаанд
Дар шаҳри Хуҷанд Намоишгоҳи X байналмилалии савдо «Суғд-2024» доир мегардад
Корхонаи давлатии фаръии «Обтаъминкунӣ» дар ноҳияи Ҳамадонӣ ба беш аз 4 ҳазор хоҷагӣ хизмат мерасонад
Дар Хатлон бо мақсади беҳтар гардонидани содироти маҳсулоти кишоварзӣ вохӯрӣ доир шуд
Тоҷикистон ва Туркманистон тасмим гирифтанд, ки нархгузории ягонаро барои интиқолдиҳандагон амалӣ намоянд
БАРОИ ҶАЛБИ БЕШТАРИ ҶАҲОНГАРДОН ЧӢ БОЯД КАРД? Дар Душанбе оид ба беҳтар намудани сатҳу сифати хизматрасонӣ ба сайёҳон ҳамоиш доир шуд