Ширкати ҳавопаймоии «Сомон Эйр» бори нахуст аз Душанбе ба Исломобод парвоз анҷом дод

ДУШАНБЕ, 14.12.2022 /АМИТ «Ховар»/. 13 декабр Ширкати ҳавопаймоии «Сомон Эйр» бори нахуст аз Душанбе ба Исломобод парвоз анҷом дод. Дар ин бора ба АМИТ «Ховар» дар хадамоти матбуоти «Сомон Эйр» хабар доданд.

Ояндаи наздик дар доираи барномаи тавсеаи шабакаи парвозҳо «Сомон Эйр» тасмим гирифтааст, ки парвозҳои мунтазамро ба Ҷумҳурии Исломии Покистон роҳандозӣ намояд. Ин ба рушди муносибатҳои дуҷонибаи кишварҳо такони нав мебахшад.

Имсол ба барқарории муносибатҳои дипломатӣ миёни Ҷумҳурии Тоҷикистон ва Ҷумҳурии Исломии Покистон 30 сол пур шуд. Ифтитоҳи хатсайри мустақим дар ин сол басо рамзӣ буда, бевосита ба таҳким ва тавсеаи ҳамкорӣ дар бахшҳои фарҳанг, иқтисоду тиҷорат ва рушди сайёҳӣ мусоидат хоҳад кард.

Душанбе ва Исломобод дар як минтақаи вақтӣ қарор доранд, ки ин албатта, барои мусофирон хеле мувофиқ мебошад. Давомнокии парвоз аз Душанбе то Исломобод 90 дақиқа буда, парвозҳо тавассути ҳавопаймоҳои бароҳати Boeing 737 — 800/900 сурат мегиранд.

Хотиррасон мешавем, ки ширкати «Сомон Эйр» аз соли 2008 дар бозори байналмилалӣ муваффақона фаъолият намуда, узви Ассотсиатсияи байналмилалии нақлиёти ҳавоӣ (IATA) мебошад. Парки ширкати «Сомон Эйр» аз ҳавопаймоҳои Boeing 737-800 ва 737-900 иборат аст. Бехатарӣ, тавсеаи шабакаи парвозҳо ва парки ҳавопаймоӣ аз афзалияти ширкат мебошанд.

Дар айни замон ширкати ҳавопаймоии «Сомон Эйр» аз Тоҷикистон ба Олмон, Амороти Муттаҳидаи Араб, Туркия, Ҳиндустон, Россия, Қазоқистон ва Узбекистон парвозҳои мунтазам анҷом медиҳад.

 АКС: ширкати ҳавопаймоии «Сомон Эйр»