7 нафари аз заминларзаи Туркия наҷотёфта бар асари сӯхтор дар қисми марказии мамлакат ҳалок шудаанд

ДУШАНБЕ, 20.02.2023 /АМИТ «Ховар»/. 7 нафаре, ки аз заминларзаи шадид дар Туркия наҷот ёфта буданд, имрӯз бар асари сӯхтор дар шаҳри Қуния дар қисми марказии ин давлат, ки муваққатан дар онҷо зиндагӣ мекарданд, ҳалок шуданд. Дар ин хусус расонаҳои маҳаллӣ иттилоъ додаанд.

Ҳамаи ҳафт нафари ҳалокшуда аз оилаи ҳаштнафараи суриягиҳо буданд, ки пас аз заминларзаҳои шадид дар вилояти ҷанубии Ғозиёнтеппа ба назди хешовандон ба шаҳри Қуния кӯчида омада буданд, хабар медиҳад агентии нимарасмии «Анадолу».

Иттилоъ дода мешавад, ки ҳалокшудагон ҳарду волид ва панҷ нафар фарзандони онҳо дар синни аз 4 то 13-сола будаанд.

Тавре ки «Анадолу» бо истинод ба як нафар шоҳид хабар додааст, сабаби сӯхтор эҳтимол гармкунаки барқӣ ё плитае гардид, ки шабона фаъол гузошта шуда буд.

Азиза ДАДАБОЕВА,
АМИТ «Ховар»

АКС: «Синхуа»