Дар шаҳри Бӯстон 200 бех ниҳоли ҳамешасабзи ороишии санавбар ва дарахти коҷ шинонида шуд

ДУШАНБЕ, 22.02.2023 /АМИТ «Ховар»/. 20 феврал дар шаҳри Бӯстони вилояти Суғд маъракаи ниҳолшинонӣ оғоз гардида, дар кӯчаву хиёбонҳои шаҳр 200 бех ниҳоли ҳамешасабзи ороишии санавбар ва дарахти коҷ шинонида шуданд, хабар медиҳад АМИТ «Ховар» бо истинод ба Мақомоти иҷроияи ҳокимияти давлатии ин шаҳр.

Дар мавсими имсола шинонидани қариб 1500 бех дарахти ҳамешасабзу паҳнбарг пешбинӣ шудааст.

Мақомоти иҷроияи ҳокимияти давлатии шаҳри Бӯстон бобати сарсабзу хуррам намудани шаҳр дар якҷоягӣ бо сокинон мунтазам корҳои ободониву созандагиро ба роҳ монда, дар мавсими ниҳолу гулшинонӣ аз ҳар рӯзи мусоид самаранок истифода менамоянд.

Ҳар ҳафта рӯзи шанбе бо иштироки доираи васеи сокинони шаҳр — кормандони касбу кори гуногун корҳои тозагию ободонӣ ташкил гардида, гулу буттаҳо ва дарахтони ороишӣ шинонида мешаванд.

АКС: Мақомоти иҷроияи ҳокимияти давлатии шаҳри Бӯстон