ФОНДИ БАЙНАЛМИЛАЛИИ НАҶОТИ АРАЛ. Бахшида ба 30-солагии таъсиси фонд дар Душанбе конфронси байналмилалӣ доир карда мешавад

ДУШАНБЕ, 25.02.2023 /АМИТ «Ховар»/. Даҳаи аввали моҳи июн дар Душанбе бахшида ба 30-юмин солгарди таъсиси Фонди байналмилалии наҷоти Арал конфронси байналмилалӣ баргузор карда мешавад, иттилоъ медиҳад АМИТ «Ховар» бо истинод ба Вазорати энергетика ва захираҳои оби Ҷумҳурии Тоҷикистон.

Фонди байналмилалии наҷоти Арал соли 1993 аз ҷониби роҳбарони давлатҳои Осиёи Марказӣ таъсис дода шуда, имсол аз таъсиси  он 30 сол сипарӣ мегардад.

Ҳадафи таъсиси фонди мазкур, пеш аз ҳама, бартарафсозии буҳрони экологӣ ва беҳдошти вазъи иҷтимоию иқтисодӣ дар ҳавзаи баҳри Арал мебошад,  ки батадриҷ пастшавии сатҳи онро ҷомеаи ҷаҳонӣ яке аз фоҷиаҳои асри ХХ арзёбӣ намуда буд.

Рамзи ҷашнии 30-солагии  Фонди байналмилалии наҷоти Арал аз ҷониби Президенти Фонди байналмилалии наҷоти Арал  Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон тасдиқ гардидааст.

 АКС: Вазорати энергетика ва захираҳои оби Ҷумҳурии Тоҷикистон