Маҷмӯи маҳсулоти дохилии Тоҷикистон соли 2022 ба 115,7 миллиард сомонӣ баробар гардид

ДУШАНБЕ, 18.02.2023 /АМИТ «Ховар»/. Тибқи омори расмӣ, Маҷмӯи маҳсулоти дохилии ҷумҳурӣ соли сипаригардида ба 115,7 миллиард сомонӣ ва суръати воқеии афзоиши он ба 8,0 фоиз баробар гардид.

17 феврал зимни нишасти матбуотӣ доир ба натиҷагирӣ аз фаъолияти Вазорати молияи ҷумҳурӣ дар соли 2022 ба намояндагони воситаҳои ахбори оммаи ватанӣ ва хориҷӣ гуфта шуд, ки рушди иқтисодӣ асосан аз ҳисоби соҳаҳои саноат 15,4 фоиз, кишоварзӣ- 8,0 фоиз, маблағгузорӣ ба сармояи асосӣ- 11,4 фоиз хизматрасонии пулакӣ дар ҳамаи соҳаҳои хизматрасонӣ- 16,0 фоиз, мусофиркашонӣ- 13 фоиз, гардиши савдо- 11,2 фоиз ва гардиши савдои хориҷӣ- 14,9 фоиз таъмин гардид.

Иброз гардид, ки нақшаи пешбинишудаи даромад аз ҳисоби воридоти андозӣ дар сатҳи 106,5 фоиз ё ба маблағи 21,8 миллиард сомонӣ ва нақшаи даромади ғайриандозӣ 118,5 фоиз ё 2,4 миллиард сомонӣ иҷро шуд. Инчунин ба буҷети суғуртаи иҷтимоӣ ва нафақа аз ҳисоби андози иҷтимоии корхонаҳои ғайрибуҷетӣ 2,0 миллиард сомонӣ ворид шуда, иҷрои нақша дар сатҳи 97,0 фоиз таъмин гардид.

Бо дахли татбиқи лоиҳаҳои сармоягузории давлатӣ тазаккур дода шуд, ки дар доираи татбиқи лоиҳаҳои сармоягузории давлатӣ 6,8 миллиард сомонӣ аз худ гардидааст. Аз он 3,7 миллиард сомонӣ ё 55 фоизро маблағҳои грантӣ ва 3 миллиард сомонӣ ё 45 фоизро маблағҳои қарзӣ ташкил медиҳанд.

Таъкид шуд, ки аз ҳисоби хизматрасониҳои пулакӣ ба суратҳисоби махсуси ташкилоти буҷетӣ 3,3 миллаирд сомонӣ ворид гардид.

Дар ин давра Вазорати молияи мамлакат фаъолияташро ба татбиқи чорабиниҳо барои пешбурди фаъолияти молиявӣ дар самти буҷету андоз, баҳисобгирии муҳосибӣ ва ҳисоботи молиявӣ, суғуртавӣ, бозори молиявӣ, коғазҳои қиматноки давлатӣ, хазинаи сарватҳои давлатӣ, ба Буҷети давлатӣ ва фондҳои давлатӣ ворид намудани андозҳо, боҷҳо ва дигар пардохтҳои давлатӣ равона намуд.

Марзия САИДЗОДА,
АМИТ «Ховар»

АКС: АМИТ «Ховар»