Соҳибкорони вилоятҳои Суғд ва Нижегород 13 шартномаи ҳамкорӣ ба имзо расониданд

ДУШАНБЕ, 11.02.2023 /АМИТ«Ховар»/.  Соҳибкорони вилоятҳои Суғди Ҷумҳурии Тоҷикистон ва Нижегороди Федератсияи Русия зимни форуми тиҷоратӣ 13 шартномаи ҳамкорӣ байни корхонаву ширкатҳои истеҳсолии вилоятҳо ба имзо расониданд. Дар ин хусус АМИТ «Ховар» бо истинод ба Хадамоти матбуоти Раиси вилояти Суғд хабар медиҳад.

Иброз гардид, ки гардиши молу маҳсулот миёни вилояти Суғд ва минтақаҳои Федератсияи Русия дар соли гузашта 616,6 миллион долларро ташкил дода, иқтидори мавҷуда имкон медиҳад, ки ҳаҷми мубодилаи молу маҳсулот ба маротиб зиёд карда шавад.

Дар кори форум масъулини идораҳои давлатии ду вилоят доир ба имкониятҳои ду тараф иттилоъ доданд. Аз ҷумла ба соҳибкорони вилояти Нижегород доир ба навгониҳои соҳаҳои хоҷагии халқи вилояти Суғд, сармоягузорӣ ва захираву имкониятҳои мавҷуда дар соҳаҳои саноату кишоварзӣ маълумот дода шуд.

Сипас, роҳбарияти ҳар ду вилоят ҳамкории дуҷонибаро дар бахшҳои гуногун, аз ҷумла истеҳсоли маҳсулоти тайёр аз пахта, истихроҷу коркарди маъдан ва металҳои қиматбаҳо, дорусозӣ, коркарди маҳсулоти кишоварзӣ, гӯшту шир, мошинсозӣ баррасӣ карданд.

АКС: Хадамоти матбуоти Раиси вилояти Суғд