«ҶАҲОНИ МУОСИР, ЧОЛИШҲО ВА УМЕДҲО». Ҳайати Тоҷикистон дар Форуми байналмилалӣ дар Боку иштирок намуд

ДУШАНБЕ, 13.03.2023 /АМИТ «Ховар»/. Ҳайати Ҷумҳурии Тоҷикистон таҳти роҳбарии Вазири нақлиёти ҷумҳурӣ Азим Иброҳим дар Форуми 10-уми байналмилалии «Ҷаҳони муосир, чолишҳо ва умедҳо», ки 9-11 март дар Боку бо ибтикори  Маркази байналмилалии Низомии Ганҷавӣ доир гардид, иштирок намуд. Дар ин хусус АМИТ «Ховар» бо истинод ба Вазорати нақлиёти ҷумҳурӣ иттилоъ медиҳад.

Форум таҳти сарпарастии Президенти Озарбойҷон Илҳом Алиев доир гардида, дар  он ҳайатҳои бонуфуз ва баландпояи давлатҳои ҷаҳон, созмонҳои муътабари байналмилалӣ ва минтақавӣ, дар маҷмуъ 360 намоянда аз 61 мамлакат иштирок намуд.

Дар форум омилҳое, ки ба низоми ҷаҳони муосир таҳдид мекунанд, масъалаҳои марбут ба амният ва дурнамои таъмини сулҳ, барқарории субот дар ҷаҳони пароканда, таъсири он ба ҷаҳон, роҳҳои таъмини ҳалли мушкилоте, ки башарият бо он рӯ ба рӯ гардидааст, аз қабили   низоъҳо, таҳдидҳои бузурге, ки ҷаҳонро такон медиҳанд, масъалаҳои тағйирёбии иқлим, амнияти ҳастаӣ, ифротгароӣ, муҳоҷират, озуқаворӣ ва фақр баррасӣ гардиданд.

АКС: Вазорати нақлиёти Ҷумҳурии Тоҷикистон