«ЛУТФИ АШӮР САФАР». Дар Душанбе нашри дуюми китоби мазкур аз чоп баромад

ДУШАНБЕ, 14.03.2023 /АМИТ «Ховар»/. «Лутфи Ашӯр Сафар» — таҳти чунин унвон нашри дуюми китоби шоир Гурез Сафар дар шакли комилтар бо таҳриру иловаҳои нав бо теъдоди 5 ҳазор нусха нашр гардид, хабар медиҳад мухбири АМИТ «Ховар».

Тавре дар сарсухани китоб омадааст, «лутфи намакин, пурнеш, тунду завқбахш ва нишонраси устод Ашӯр Сафар дар ҳама маврид, дар ҳама сатҳ дар ҳузури ҳамагон ранг-ранг бадоҳатан ба гӯш мерасид, шодиву нишот, дасттакониву санохонӣ меангехт, атрофиёнро сари андеша мекашид ва аз даҳон ба даҳон мегузашту аз қаламрави Кӯлоб берун баромада, ба дуриҳо мерасид».

Китоби мазкур бо лутфу зарофатҳои Шоири халқии Тоҷикистон, барандаи Ҷоизаи давлатии Тоҷикистон ба номи Абуабдуллоҳ Рӯдакӣ Ашӯр Сафар дар шакли комилтар нашр гардидааст.

Хонандагон метавонанд зарофатҳои шоирро дар мавзуъҳои «Суратгирӣ», «Доруи иштиҳо», «Дили халқ аз шумо», «Ду қудо», «Шаҳр бояд туро тамошо кунад» ва ғайра мутолиа намоянд.

АКС: АМИТ «Ховар»