НАВРӮЗ БАРОБАРИ ҶАШНИ ИСТИҚЛОЛ АЗИЗ АСТ. Дар шаҳри Хоруғ базми пуршукуҳи наврӯзӣ доир гардид

Март 22, 2023 15:55

ХОРУҒ, 22.03.2023. /АМИТ «Ховар»/. Дар Ҷашни байналмилалии Наврӯз, ки дар маҳаллаи Хоруғи болои шаҳраки Шоҳтемуриён доир шуд, сокинони шаҳри Хоруғ базми пуршукуҳи идона оростанд. Ҳамзамон роҳбарияти Вилояти Мухтори Кӯҳистони Бадахшон, Вазорати саноат ва технологияҳои нави Тоҷикистон ва шаҳри Хоруғ аз намоиши маҳсулоти дастии ҳунармандон ва корхонаҳои хурди «Насим», «Ниссо», «Чипсбарорӣ», «Авесенна» дидан намуданд, иттилоъ додааст мухбири минтақавии АМИТ «Ховар» Файз Мирасан.

Дар ҷамъомад Раиси Вилояти Мухтори Кӯҳистони Бадахшон таъкид намуд, ки «маҳз бо шарофати Наврӯз бисёр расму оин ва анъанаҳои неки ниёгони мо ҳифз ва дар замони соҳибистиқлолӣ дубора эҳё гардид. Фарорасии Наврӯзи имсола ба марҳилае рост омад, ки дар таърихи вилоят бо иқдоми наҷиби Президенти Ҷумҳурии Тоҷикистон муҳтарам Эмомалӣ Раҳмон марҳилаи нави  рушди соҳаҳои гуногуни хоҷагии халқи вилоят эълон гардидааст. Ҳарчанд аз эълони ин иқдом вақти зиёд нагузашта бошад ҳам, аммо дар ин фурсати кӯтоҳ корҳои зиёди ободониву созандагӣ  дар шаҳри Хоруғ ва ноҳияҳои вилоят анҷом дода шуданд».

Гуфта шуд, ки дар асоси нақшаи марҳилаи нави рушди иқтисодию иҷтимоии шаҳри Хоруғ, пеш аз ҳама, ба масъалаи таъмини сокинон бо манзили истиқоматӣ, ки даҳсолаҳо ба таъхир афтода буд, аҳамияти ҷиддӣ дода мешавад. Қарор аст, ки дар се соли оянда чанд бинои аз даҳошёна боло ба истифода дода шавад ва бо ҳамин минвол садҳо сокини шаҳр соҳиби хонаи истиқоматӣ хоҳанд шуд.


Раиси вилоят нақши Пешвои миллатро дар эҳёи расму суннатҳои Наврӯз ва ба ҷашни байналмилалӣ табдил ёфтани он муассир хонда, изҳор дошт, ки «дар муддати бештар аз даҳ сол миллатҳои гуногун дар саросари ҷаҳон сарфи назар аз бовару эътиқод Наврӯзро бо самимияти хос ҷашн мегиранд. Барои мардуми вилоят Наврӯз баробари ҷашни Истиқлоли давлатӣ азиз аст».

Базми наврӯзии сокинони  шаҳри Хоруғ бо барномаи ҳунарии  ҳунармандони бахши фарҳанги шаҳри Хоруғ  ба поён расид.

АКС: АМИТ «Ховар»

Март 22, 2023 15:55

Хабарҳои дигари ин бахш

Дар Душанбе бахшида ба Рӯзи фарҳанг ва Наврӯзи байналмилалӣ ҳамоиши идона доир гардид
НАШУНИДАМ НАГӮЕД! Корвони наврӯзӣ ба сокинону меҳмонони шаҳри Душанбе муждаи баҳор меорад
Доир ба натиҷаҳои маҷмуии таҳқиқоти бостоншиносӣ дар Тоҷикистон конференсияи байналмилалӣ оғоз шуд
ХОНАТАКОНӢ. Тоҷикон Наврӯзро бо тозасозии манзили зист ва поксозии қалб пешвоз мегиранд
ЭЙ ЁРИ БАҲОРОЙИН, НАВРӮЗ МУБОРАК БОД! Суратгузориш аз ҷараёни таҷлили Наврӯзи байналмилалӣ дар Академияи идоракунии давлатӣ
НАВРӮЗ АЗ НИГОҲИ АСТРОНОМӢ. Имсол дар Тоҷикистон Наврӯз 20 март фаро мерасад
«ТОҶИКОНА МЕПӮШЕМ!». Дар шаҳри Бӯстон оид ба тарғиби либоси миллӣ ҳамоиш доир гардид
«НАВРӮЗ — ОМИЛИ ВАҲДАТИ МИЛЛАТҲО». Дар ноҳияи Ховалинг дар ин мавзуъ ҳамоиш доир шуд
Нақши «дипломатияи фарҳангӣ» дар ташаккули симои мусбати давлат дар хориҷа назаррас аст
ЗИ РӮЯТ НУР МЕБОРАД, АЛО ЭЙ ДУХТАРИ ТОҶИК. Дар Коллеҷи тиббии шаҳри Хоруғ ҳамоиши «Тоҷикона мепӯшем!» гузаронида шуд
ЭЙ БАҲОРИ САБЗУ ТАР, ХУШ ОМАДӢ. Суратгузориши АМИТ «Ховар» аз ҷараёни омодагиҳо ба пешвози Иди Наврӯз дар шаҳри Душанбе
Президенти Ҷумҳурии Тоҷикистон Эмомалӣ Раҳмон бо Президенти Федератсияи Русия Владимир Путин суҳбати телефонӣ анҷом доданд