НАВРӮЗ-САРҶАМЪКУНАНДАИ МИЛЛАТҲО. Дар Донишгоҳи миллии Тоҷикистон ин ҷашни фаррухпай бо иштироки меҳмонони хориҷӣ таҷлил карда шуд

Март 18, 2023 16:00

ДУШАНБЕ, 18.03.2023. /АМИТ «Ховар»/. Имрӯз Донишгоҳи миллии Тоҷикистон Ҷашни байналмилалии Наврӯзро дар фазои идона бо савту навои дилнавоз ва намоиши анъанаҳои наврӯзӣ истиқбол намуд. Дар базми наврӯзӣ дар баробари роҳбарияти донишгоҳ, устодону донишҷӯён ҳамзамон меҳмонон аз Аморати Муттаҳидаи Араб ва Федератсияи Русия иштирок намуданд, иттилоъ медиҳад мухбири АМИТ «Ховар».

Зимни ҳамоиши идона ректори донишгоҳ, профессор Қобилҷон Хушвақтзода иброз дошт, ки «Наврӯз ҳамчун рамзи некӣ ва рӯшноӣ дар сарҷамъиву ваҳдати мардум, ҷашни нуру сурур барои афзудани гармии меҳру ихлоси мардуми Тоҷикистон, равнақи созандагиву бунёдкорӣ, хуррамиву шукуфоии сарзамини аҷдодии мо нақши муассир гузошта, ҳамасола бо ҳузури хеш дар тақвими мо ба зиндагонии мардум хуррамиҳо ворид менамояд. Дар ин радиф ҳар яки мо баробари шукргузорӣ аз пойдории сулҳу ваҳдат ва соҳибистиқлолии Тоҷикистон ба хотири сарҷамъии миллат, тақвияти иқтидори давлат ва ободии фардои мамлакат бояд саҳм гузорем».

Гуфта шуд, ки ин анъанаи нек ва фарҳанги воло, ки аз таърихи пурифтихори аҷдоди ориёиямон сарчашма мегирад, асрҳо боз ба миллати мо ва халқҳои дигари Осиёи Марказӣ хизмат мекунад. Ойину суннатҳои Наврӯз ба андозае зебову ҷаззоб, саршори ормонҳои наҷиб ва мардумиву заминӣ мебошанд, ки давоми садсолаҳо аз ҷониби бисёр халқу миллатҳои дигар пазируфта шуда, ба рукни фарҳанги онҳо табдил ёфтаанд ва ҳамчун иди миллии бисёр мардумони минтақа ва ҷаҳон ҷашн гирифта мешаванд.

Зимни маҳфили идона аз ҷониби Раёсату факултетҳои донишгоҳ дастовардҳои илмиву эҷодии устодону донишҷӯён ва ҷараёни корҳои ободониву созандагӣ намоиш дода шуда, инчунин дар саҳни донишгоҳ равзаҳои махсус оид ба таърихи Наврӯз, таому бозиҳои миллӣ ва дастранҷи ҳунарҳои мардумӣ манзури ҳозирин гардонида шуд.

Дар барномаи идона санъаткорони маъруфи мамлакат ва дастаи ҳунарии донишгоҳ бо суруду рақс ва таронаҳои наврӯзӣ хотири иштирокдоронро болида гардонданд.


Сипас бо иштироки варзишгарону донишҷӯёни донишгоҳ мусобиқа ва бозиҳои миллии варзишӣ, аз ҷумла, гӯштини миллӣ (гӯштингирӣ), шоҳмот ва дигар намуди бозиҳои наврӯзӣ пешкаши ҳозирин гардонида шуд.

Зарангези ЛАТИФ,
АМИТ «Ховар»

АКС: Донишгоҳи миллии Тоҷикистон

Март 18, 2023 16:00

Хабарҳои дигари ин бахш

Наврӯз дар Хадамоти гумруки Тоҷикистон бо барномаи рангини ҳунарӣ таҷлил гардид
Наврӯз ба унвони аввалин рӯзи офариниши табиат ёдгор аз таърихи куҳани мардуми тоҷик аст
Дар саҳни Донишгоҳи байналмилалии забонҳои хориҷии Тоҷикистон бахшида ба Наврӯз бозиҳои миллӣ баргузор гардид
Дар тантанаҳои Наврӯзи байналмилалӣ дар Ҳисор меҳмонон аз Узбекистон низ иштирок намуданд
Дар Консерваторияи миллии Тоҷикистон доир ба арзишҳои миллӣ ва фарҳангии Наврӯзи байналмилалӣ конференсия баргузор гардид
ШОҲҶОИЗА- ЭЛЕКТРОМОБИЛ. Дар Вилояти Мухтори Кӯҳистони Бадахшон мусобиқаҳои варзишӣ ҷамъбаст шуданд
НАВРӮЗ-ПАЙВАНДИ ИНСОН БО ТАБИАТ. Дар Донишгоҳи аграрии Тоҷикистон ин ҷашни байналмилалиро таҷлил намуданд
Президенти Тоҷикистон: «Ҷашни Наврӯз ва истиқлолу озодӣ – ин ду мафҳуми барои ҳар яки мо азизу муқаддас аст»
Дар ноҳияи Варзоб бахшида ба таҷлили ҷашни Наврӯзи хуҷастапай чорабинии бошукуҳ баргузор гардид
Пешвои миллат: «Боиси ифтихор аст, ки Наврӯз – калимаи асили тоҷикӣ, яъне «рӯзи нав» ҳоло барои миллионҳо аҳолии сайёра ҳамчун рӯзи ҷашни фархунда вирди забон аст»
КОНИ ЛАЗЗАТ ВА ХОНИ НЕЪМАТ. Хабарнигори АМИТ «Ховар» оид ба таомҳои наврӯзӣ дар Бадахшон маълумот ҷамъоварӣ намуд
Эмомалӣ Раҳмон: «Наврӯз аз ҷумлаи бузургтарин ва маҳбубтарин ҷашнҳои тоҷикон мебошад»