ТАВАҶҶУҲ. Дар роҳи мошингарди кӯчаи Соҳилӣ ҳаракати ҳама гуна воситаи нақлиёт қатъ мегардад

ДУШАНБЕ, 25.04.2023. /АМИТ «Ховар»/. Аз 28 апрел дар роҳи мошингарди кӯчаи Соҳилӣ (дар масофаи 0,4 км) ҳаракати ҳама гуна воситаи нақлиёт қатъ гардида, муваққатан ба нақшаи хатсайрҳои мусофирбари ба ин масир фаъолияткунанда тағйирот ворид мегардад. Дар ин хусус ба АМИТ «Ховар» дар шуъбаи иттилоотии дастгоҳи Раиси шаҳри Душанбе хабар доданд.

Аз ҷумла, ба хатсайри автобусии №81 ва хатсайрҳои микроавтобусии №№ 1, 3, 5А, 30, 42, 52, 57, 58, 81 ва 88 тағйирот ворид карда шуда, фаъолияти ин хатсайрҳо то ба истифода додани кӯчаи мазкур тавассути кӯчаҳои Ҷанубӣ, М.Қосимов, Фирдавсӣ, Н.Қарабоев ба роҳ монда мешавад.

Тағйироти мазкур бинобар сабаби гузаронидани корҳои таъмирӣ ва васли шабакаҳои муҳандисӣ дар роҳи мошингарди кӯчаи Соҳилӣ (дар масофаи 0,4 км) ба роҳ монда шудааст.

Аз ин лиҳоз, Мақомоти иҷроияи ҳокимияти давлатии шаҳри Душанбе  аз ронандагони воситаҳои нақлиёт эҳтиромона хоҳиш менамояд, ки  ки талаботи аломатҳои роҳро риоя намуда  аз роҳҳои ҳамшафати кӯчаи Соҳилӣ  истифода баранд.

АКС: АМИТ «Ховар»