Сокинони шаҳри Конибодом заминҳои наздиҳавлигии худро самараноку оқилона истифода мебаранд

Май 3, 2023 09:50

ДУШАНБЕ, 03.05.2023. /АМИТ «Ховар»/. Сокинони шаҳри Конибодом ҷиҳати амалӣ намудани дастуру ҳидоятҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон оид ба ҳарчи бештар истеҳсол кардани маҳсулоти кишоварзӣ ва барои ду сол захира намудани маводи зарурии ғизоӣ заминҳои наздиҳавлигии худро самараноку оқилона истифода мебаранд. Зеро вазъи имрӯзаи ҷаҳони муосир тақозо менамояд, ки масъалаи таъмини амнияти озуқаворӣ дар мадди аввал қарор гирад ва ҳар қитъа замини корам самараноку оқилона истифода шавад.

Тавре хабарнигори минтақавии АМИТ «Ховар» иттилоъ медиҳад, сокинон асосан дар заминҳои наздиҳавлигӣ картошка, сабзавот  ва полезӣ кишту парвариш карда, давоми сол ду-се ҳосил мегиранд ва дар баробари оилаи худ бозори дохилиро ҳам бо маҳсулоти тару тозаи кишоварзӣ таъмин менамоянд.

Истеҳсоли барзиёди маҳсулоти кишоварзӣ, ки дар заминаи истифодаи самараноку оқилонаи замин ба вуҷуд меояд, дар беҳдошти рӯзгори сокинон аҳамияти муҳим дошта, имрӯз дар ҳар оила ба як амали ҳатмӣ ва маъмулӣ табдил ёфтааст.

Сокини деҳоти Фирӯзобаи шаҳри Конибодом Муҳайё Ҳоҷиматова дар 0,04 гектар замин 12 намуд зироати кишоварзиро кишту парвариш намуда, давоми сол эҳтиёҷоти оилаи худро бо маҳсулоти кишоварзӣ аз ҳамин ҳисоб таъмин менамояд. Ҳамчунин дар назди ҳавлӣ дарахтони мевадиҳандаи себ, олуча, зардолу, шафтолу, гелос, хурмо ва ангур парвариш меёбад.

Имрӯзҳо дар хоҷагиҳои кишоварзии деҳоти Фирӯзобаи шаҳри Конибодом кишти шолӣ ва полезиҳо идома дорад. Нашъунамои ғалладонагиҳо – гандум ва ҷав, инчунин картошка ва сабзавоти барвақтӣ,  ба монанди сабзӣ ва пиёз хуб арзёбӣ мешавад.

Дар деҳоти Фирӯзоба кишоварзони Хоҷагии деҳқонии ба номи “Абдулҳай” дар майдони 70 гектар замин гандуму ҷав, шолӣ, пахта, харбузаю тарбуз ва дигар намуди зироатро кишт намудаанд. Тибқи маълумоти хоҷагидорон, ин заминҳо солҳои зиёд бо сабаби баланд шудани обҳои зеризаминӣ ва норасоии оби полезӣ аз гардиши кишоварзӣ берун монда буд. Аммо давоми чор соли охир хоҷагидорон бо тоза намудани заҳбуру заҳкашҳои атроф ва насби муҳаррикҳои нави обкаш дар ин заминҳо кишти зироатро васеъ ба роҳ монда, ҳамасола ҳосили фаровон ҷамъоварӣ мекунанд.

Ҳоло кишоварзони хоҷагӣ ба кишти асосии шолӣ машғуланд. Дар ин хоҷагӣ дурнамои кишти асосии шолӣ 30 гектарро ташкил медиҳад.

Ҳамасола дар шаҳри Конибодом бо васеъ намудани майдони кишт ва риояи қоидаҳои агратехникӣ ҳосилнокии тамоми намуди зироат баланд ва ҳаҷми истеҳсоли маҳсулоти кишоварзӣ зиёд карда мешавад. Ин ба он хотир аст, ки дар бозори дохилӣ фаровонии маҳсулоти кишоварзӣ таъмин ва сатҳу сифати зиндагии мардум боз ҳам беҳтар гардад.

АКС: Хадамоти матбуоти Президенти Ҷумҳурии Тоҷикистон/АМИТ «Ховар»

Май 3, 2023 09:50

Хабарҳои дигари ин бахш

Ҳайати Тоҷикистон дар Форуми чоруми Осиёи Марказӣ оид ба пиринг ва интерконнект иштирок намуд
ТАЪМИНИ АҲОЛӢ БО ГАРМӢ. Маркази барқу гармидиҳии №2-и шаҳри Душанбе ба кор шуруъ намуд
Директори «Агентии Тоҷикстандарт» бо фаъолияти озмоишгоҳҳои Пажӯҳишгоҳи миллии метрологии Узбекистон шинос шуд
Гардиши савдо байни Тоҷикистон ва Русия тақрибан 2 миллиард доллари амрикоиро ташкил дод
Ҷаласаи 21-уми Комиссияи байниҳукуматии Тоҷикистону Русия баргузор гардид
Тақвияти ҳамкории Бонки миллии Тоҷикистон бо ширкати «Al Fardan Exchange» баррасӣ карда шуд
Ҳамкорӣ дар раванди таҳияи «Барномаи нави кишварӣ барои солҳои 2026-2030» баррасӣ карда шуд
Исломиддин Раҳмон дар ҳамоиши Кумитаи байналмилалии вазну ченак дар Тошканд иштирок намуд
Дар Душанбе ҷаласаи 81-уми Шурои роҳбарони хадамоти гумруки кишварҳои аъзои ИДМ доир гардид
Дар кишварҳои аъзои Иттиҳоди Давлатҳои Мустақил барӯйхатгирии аҳолӣ гузаронида мешавад
Парки саноатии муштараки Тоҷикистону Русия таъсис дода мешавад
Таҳкими ҳамкории «Амонатбонк» бо Бонки давлатии рушди Чин дар Сиан баррасӣ гардид