Пешвои миллат Эмомалӣ Раҳмон дар ноҳияи Ховалинг бо лоиҳаи «Истироҳатгоҳи тобистона барои кӯдакон ва наврасони ятим» шинос гардиданд

Июнь 20, 2023 09:03

ДУШАНБЕ, 20.06.2023 /АМИТ «Ховар»/. Дар идомаи сафари корӣ дар ноҳияи Ховалинг Асосгузори сулҳу ваҳдати миллӣ-Пешвои миллат Президенти Ҷумҳурии Тоҷикистон муҳтарам Эмомалӣ Раҳмон бо лоиҳаи «Истироҳатгоҳи тобистона барои кӯдакон ва наврасони ятим» шинос гардида, барои бунёди иншооти мазкур ба масъулин дастуру супоришҳои муфид доданд.

Зимни муаррифӣ иброз гардид, ки иншооти мазкур барои фароғату истироҳати мавсимии 200 кӯдаку навраси ятим пешбинӣ гардидааст.

Иншооти мазкур дар яке аз мавзеъҳои хушбоду ҳавои ноҳияи Ховалинг бунёд ёфта, аз 3 ошёна иборат хоҳад буд, ки дар он 23 утоқ ҷой дода мешавад. Ҷойи хоби духтарон дар алоҳидагӣ ва аз писарон дар алоҳидагӣ бунёд хоҳад гашт.

Ҳамчунин тибқи нақша дар истироҳатгоҳи мазкур синфхонаҳои омӯзиши касбу ҳунари духтаронаву писарона ташкил гардида, дар идомаи истироҳат кӯдакону наврасон ба машғулияти касбомӯзӣ фаро гирифта мешаванд. Дарсҳои омӯзиши малакаи рассомӣ низ дар синфхонаҳои алоҳидаи муҷаҳҳаз гузаронида мешаванд. Ҳамчунин дар назар аст, ки дар дохили истироҳатгоҳи мазкур толори тамошои синамо, толор барои гузаронидани чорабиниҳои фарҳангӣ, ошхона барои истироҳаткунандагон бунёд гардида, роҳравҳои барҳавову зебо низ сохта ба истифода дода шавад.

Аснои муаррифии тарҳи мазкур иброз гардид, ки дар дохили бино ҳамчунин бунгоҳи тиббӣ, утоқи алоҳидаи муррабиён, ҳуҷраи хӯроктақсимкунӣ ҷой дода мешавад ва ҳамчунин истироҳаткунандагон метавонанд аз фаъолияти китобхонаи барҳаво низ ҳангоми истироҳат истифода баранд.

Намои берунаи иншоот низ бо дизайни зебову замонавӣ бунёд гардида, дар саҳни истироҳатгоҳ ҳавз барои оббозӣ, суҳбаткадаҳои зебову замонавӣ, майдони хурди варзишӣ ва як майдони замонавӣ барои бозиҳои футбол ҷой дода мешавад. Тибқи лоиҳа, ҳамчунин пурра гирду атрофи иншоот сабзпуш карда шуда, барои сайру гашти истироҳаткунандагони низ шароити зарурӣ фароҳам оварда мешавад.

Истироҳатгоҳи тобистона барои кӯдакон ва наврасони ятим дар доираи дастуру супоришҳои Президенти Ҷумҳурии Тоҷикистон муҳтарам Эмомалӣ Раҳмон аз ҷониби соҳибкор Раҳмидин Каримов бунёд карда мешавад ва тибқи нақша, корҳои сохтмонии он то таҷлили 35-солагии Истиқлоли давлатии Ҷумҳурии Тоҷикистон ба анҷом расонида мешавад.

Бунёди иншооти мазкур имконият медиҳад, ки кӯдакону наврасони ятим таътилҳои худро дар шароити мусоиду мувофиқ пушти сар намуда, дар ин баробар ба омӯзиши касбу ҳунар дар ин ҷо ҷалб гарданд.

Зимни шиносоӣ бо лоиҳа Пешвои муаззами миллат чунин иқдоми соҳибкорро намунаи ибрат ва қобили дастгирӣ хонда, барои фароҳамсозии шароити мусоид ба кӯдакону наврасони ятим дар ин истироҳатгоҳ ба масъулин маслиҳатҳои муфид доданд.

Муаррифии лоиҳаи Истироҳатгоҳи тобистона барои кудакон ва наврасони ятим дар ноҳияи Ховалинг 20.06.2023

Июнь 20, 2023 09:03

Хабарҳои дигари ин бахш

Маҷлиси Ҳукумати Ҷумҳурии Тоҷикистон баргузор шуд
Фармони Президенти Ҷумҳурии Тоҷикистон
Дар шаҳри Истаравшан сохтмони зиёда аз 20 иншооти соҳаи маориф идома дорад
35-СОЛАГИ ИСТИҚЛОЛИ ДАВЛАТӢ. Дар Ховалинг таъмиру навсозии беш аз 200 иншоот ба нақша гирифта шудааст
Сокинони маҳаллаи Наврӯзи шаҳри Бӯстон бо оби нӯшокӣ таъмин гардиданд
Дар ҳудуди шаҳри Гулистон сохтмони меҳмонхона ва осоишгоҳу марказҳои солимгардонӣ идома доранд
Қитъаи муҳими роҳи Душанбе – Хоруғ – Қалъаихумб бо пулу нақб мавриди истифода қарор гирифт
Пешвои миллат Эмомалӣ Раҳмон пас аз анҷоми сафари корӣ дар Вилояти Мухтори Кӯҳистони Бадахшон ба шаҳри Душанбе баргаштанд
Дар ВМКБ беш аз 1000 иншоот ба истиқболи 35-солагии Истиқлоли давлатӣ мавриди истифода қарор гирифт
Президенти Ҷумҳурии Тоҷикистон Эмомалӣ Раҳмон бо роҳбарон ва фаъолони Вилояти Мухтори Кӯҳистони Бадахшон мулоқот намуданд
Суханронии Президенти Ҷумҳурии Тоҷикистон, Пешвои миллат Эмомалӣ Раҳмон дар мулоқот бо роҳбарон ва фаъолони Вилояти Мухтори Кӯҳистони Бадахшон
Президенти Ҷумҳурии Тоҷикистон Эмомалӣ Раҳмон дар шаҳри Хоруғ дар тантанаҳои идона ба ифтихори 28-солагии Рӯзи ваҳдати миллӣ иштирок намуданд