Дар Хатлон неругоҳи офтобӣ бо иқтидори умумии 500 мегаватт сохта мешавад

ДУШАНБЕ, 31.03.2026. /АМИТ «Ховар»/. Ширкати «СЕТС»-и Ҷумҳурии Мардумии Чин нақша дорад, ки дар вилояти Хатлон неругоҳи офтобӣ бо иқтидори умумии 500 мегаватт сохта, ба истифода диҳад.

Тавре аз хадамоти матбуоти Раиси вилояти Хатлон ба АМИТ «Ховар» иттилоъ доданд, масъалаи сохтмони неругоҳи офтобӣ 28 март зимни вохӯрии Раиси вилояти Хатлон Давлаталӣ Саид ва намояндагони ширкати Ҷумҳурии Мардумии Чин мавриди баррасӣ қарор дода шуд.

Гуфта шуд, ки татбиқи чунин лоиҳаи бузург на танҳо ба ҳалли мушкилоти мавҷудаи таъмини барқ мусоидат мекунад, балки барои истифодаи манбаъҳои барқароршавандаи энергия ва ҳифзи муҳити зист низ замина мегузорад.

Зимни мулоқот ҷонибҳо масъалаҳои густариши ҳамкории дуҷониба, бахусус дар соҳаи энергетикаро мавриди баррасӣ қарор доданд.

Таъкид гардид, ки тақвияти ҳамкорӣ дар ин самт метавонад ба рушди устувори иқтисодии минтақа ва беҳтар гардидани шароити зиндагии аҳолӣ мусоидат намояд.

АКС: Хадамоти матбуоти Раиси вилояти Хатлон