Таваҷҷуҳи сайёҳон ба тамошои ноҳияи Мурғоб меафзояд

Июнь 18, 2023 12:01

ДУШАНБЕ, 18.06.2023. /АМИТ «Ховар»/. Имсол бо ташаббуси Кумитаи ҳифзи муҳити зисти назди Ҳукумати Ҷумҳурии Тоҷикистон дар ноҳияи Мурғоб волйер ё эҳёхонаи озодапаланг ифтитоҳ гардид. Дар ин бошишгоҳи муваққатӣ он палангоне нигоҳ дошта мешаванд, ки ҳангоми ҳуҷум ба оғилхонаи чорводорон дошта шудаанд, ё ин ки он палангони пире ҳастанд, ки дигар тавони шикор надошта, ба пастиҳо фаромадаанд.

Тавре ба АМИТ «Ховар» дар Кумитаи ҳифзи муҳити зисти мамлакат иброз доштанд, ифтитоҳи волйер дар ноҳияи Мурғоб имкон медиҳад, ки таваҷҷуҳи сайёҳони экологӣ ба ин ҷо зиёд гардад ва ин гӯшаи Тоҷикистон дар сатҳи ҷаҳонӣ шуҳрат пайдо намояд.

Мурғоб яке аз маҳалҳои муҳими сукунати озодапаланг ё бабри барфӣ аст.

Дар Мурғоб зироаткорӣ тақрибан вуҷуд надорад, аҳолии маҳаллӣ ба чорвопарварӣ (қутос (хушгов), улоғ (аспу уштур), бузу гӯсфанд) машғуланд.

Ҳамасола ба ин ҷо садҳо шикорчиёни хориҷӣ ба хотири сайди нахчир ва гӯсфанди Марко Поло меоянд. Барои хидмат ба шикорчиён дар ноҳияи Мурғоб панҷ ширкати маҳаллӣ фаъолият дорад.

Бояд гуфт, ки имсол дар ноҳияи Мурғоб нахустин боғ бунёд гардид, ки дар ҷаҳон баландтарин боғ аз сатҳи баҳр мебошад.
Шуъбаи ҳифзи муҳити зисти ин ноҳия ба нақша гирифтааст, ки чунин боғҳо ва дарахтзор дар мавзеъҳои Чечикдеҳ, Модиён, Шаймоқ, Булункӯлу Аличул, Рангкӯл низ бунёд созад ва дар талоши он аст, ки ноҳияи Мурғоб дар оянда ба яке аз мавзеъҳои ҷолиби сайёҳони экологӣ табдил ёбад.

Экологҳои ноҳия дар заминаи бинои замонавӣ осорхонаи табиати Помири шарқиро ифтитоҳ намуданд. Ҳоло дар осорхона нигораҳои зиёди ҳайвонот, наботот, ҳашарот, сангҳои кӯҳӣ, канданиҳои фоиданоки ин минтақа нигоҳ дошта мешаванд. Алҳол осорхонаи табиии ноҳия яке аз ҷойҳои муҳими ташрифи сайёҳони маҳаллӣ ва хориҷӣ гаштааст.

АКС аз манбаъҳои боз

Июнь 18, 2023 12:01

Хабарҳои дигари ин бахш

Дар даромадгоҳи дараи Камароб Маркази хизматрасонии сайёҳӣ ба истифода дода шуд
Донишгоҳи байналмилалии сайёҳӣ ва соҳибкории Тоҷикистон ҳамкориро бо ширкатҳои хориҷӣ тақвият мебахшад
Мотосиклронҳои «Ралли Осиёи Марказӣ-2025»-ро дар Тоҷикистон истиқбол гирифтанд
Нишасти муштарак байни роҳбарони ширкатҳои сайёҳии Тоҷикистон ва Эрон баргузор шуд
Ҷаласаи чоруми Гурӯҳи кории ҷумҳуриявӣ дар самти рушди сайёҳӣ доир шуд
Дар Бадахшон Форуми байналмилалии сайёҳӣ баргузор гардид
Рушди ҳамкории дуҷонибаи Тоҷикистон ва Белгия дар соҳаи сайёҳӣ баррасӣ гардид
Дар Конфедератсияи Швейтсария имконоту зарфияти сайёҳии Тоҷикистон муаррифӣ гардид
Ҷаласаи кумитаи тадорукоти «Намоишгоҳи байналмилалии сайёҳии Душанбе» доир гардид
Иқтидори сайёҳию рекреатсионии Тоҷикистон дар доираи таҳқиқи арзишманд муаррифӣ гардид
Дар Душанбе оид ба омодагӣ ба Форуми сармоягузорӣ дар соҳаи сайёҳӣ брифинг доир шуд
Телефони боварии Кумитаи рушди сайёҳӣ мушкили беш аз 30 ҷаҳонгарди хориҷиро бартараф намуд