Дар Душанбе нишасти Гурӯҳи доимамалкунандаи ҳамкории саноатӣ ва иқтисодии Тоҷикистон ва Чехия доир гардид

ДУШАНБЕ, 18.07.2023 /АМИТ «Ховар»/. Дар Душанбе ҷаласаи 2-юми Гурӯҳи доимамалкунандаи байниидоравии Тоҷикистон ва Чехия оид ба ҳамкории саноатӣ ва иқтисодӣ бо иштироки роҳбарияти мақомоти соҳавии ду давлат баргузор гардид.

АМИТ «Ховар» бо истинод ба Вазорати саноат ва технологияҳои нави ҷумҳурӣ иттилоъ медиҳад, ки ҷонибҳо сатҳи кунунӣ ва дурнамои ҳамкории дуҷониба дар бахшҳои гуногуни тиҷорату иқтисод, саноат, энергетика, нақлиёт, кишоварзӣ, молия, илму таҳқиқот, фановариҳои муосир ва сайёҳиро баррасӣ намуданд.

Бо мақсади густариши робитаҳои баъдӣ зарурати татбиқи лоиҳаҳову барномаҳои муштарак, аз ҷумла амалисозии кластери агросаноатӣ, саноат, бахусус дар соҳаҳои мошинсозӣ, нассоҷӣ, истеҳсолӣ, саноати кӯҳӣ, металлургӣ, электротехникӣ, нақлиёт, тиҷорат, рушди соҳибкорӣ, энергетика ва туризм таъкид гардид.

Ба ин муносибат эҷод ва фаъол намудани абзори навин ва муосири ҳамкории саноати истеҳсолӣ ва сармоягузорӣ, ба монанди анҷуманҳои тоҷирон ва намоишҳои маҳсулоти ду давлат муҳим дониста шуд.

АКС: Вазорати саноат ва технологияҳои нави Ҷумҳурии Тоҷикистон