Дар маҳаллаи Сангин Ниёзови ноҳияи Мастчоҳ Маркази хайриявии таълимию касбомӯзии «Тоҷикона» ба истифода дода шуд

ДУШАНБЕ, 05.04.2026 /АМИТ «Ховар»/. Дар доираи сафари кории Президенти Ҷумҳурии Тоҷикистон муҳтарам Эмомалӣ Раҳмон ба ноҳияи Мастчоҳ дар маҳаллаи Сангин Ниёзови деҳоти Оббурдони ноҳия Маркази хайриявии таълимию касбомӯзии «Тоҷикона» ба истифода дода шуд.

Тавре АМИТ «Ховар» бо истинод ба Мақомоти иҷроияи ҳокимияти давлатии ноҳияи Мастчоҳ хабар медиҳад, марказ бо ташаббуси соҳибкорони ватанӣ ва блогери маъруф Диловар Сафаров бо ҳадафи баланд бардоштани сатҳи шуғли занону духтарони маҳаллӣ ва соҳибкасб намудани онҳо бунёд гардидааст. Фаъолияти муассиса асосан ба ҷалби занону духтарони хонанишин ба омӯзиши ҳунарҳои амалӣ ва фароҳам овардани шароити мусоид барои дарёфти даромади мустақил равона шудааст.

Бинои марказ аз се ошёна иборат буда, дар қабати дуюми он синфхонаҳои муҷаҳҳаз барои омӯзиши касби дӯзандагӣ ташкил гардидаанд. Дар ин ҷо барои 16 зану духтар ҷойи кору омӯзиш муҳайё карда шуда, онҳо бо истифода аз мошинаҳои муосири дарздӯзӣ нозукиҳои касбро меомӯзанд.

Тавре масъулон иттилоъ доданд, омӯзиши касби дӯзандагӣ дар марказ ба таври ройгон ба роҳ монда шуда, муҳлати машғулият то се моҳро дар бар мегирад. Пас аз хатми муваффақонаи давраи омӯзишӣ ба хатмкунандагон бо мақсади дастгирӣ ва мусоидат ба оғози фаъолияти мустақил мошинаҳои дӯзандагии замонавӣ ройгон тақдим мегарданд.

Дар марказ на танҳо ба омӯзиши ҳунари дӯзандагӣ, балки ба ташаккули малакаҳои ибтидоии соҳибкорӣ низ таваҷҷуҳ зоҳир мегардад. Бо ин мақсад ба дарсдиҳӣ мутахассисони соҳибтаҷриба ҷалб гардида, онҳо ба шогирдон роҳҳои дурусти ташкили фаъолияти истеҳсолӣ, муносибат бо бозор ва рушди тиҷорати хурдро меомӯзонанд.

Ифтитоҳи чунин маркази таълимию касбомӯзӣ дар деҳоти Оббурдон қадами муҳим дар самти баланд бардоштани сатҳи зиндагии аҳолӣ, фароҳам овардани ҷойи нави кор ва тақвияти нақши занон дар иқтисоди маҳаллӣ арзёбӣ мегардад.

АКС: Мақомоти иҷроияи ҳокимияти давлатии ноҳияи Мастчоҳ