Пешвои миллат Эмомалӣ Раҳмон дар шаҳри Хуҷанд Коргоҳи коркард ва истеҳсоли конструксияҳои металлии ҶДММ «Сохтмони Кабир»-ро ифтитоҳ намуданд

Июль 6, 2023 09:58

ДУШАНБЕ, 06.07.2023. /АМИТ «Ховар»/. Дар идомаи сафари корӣ дар шаҳри Хуҷанди вилояти Суғд Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Коргоҳи коркард ва истеҳсоли конструксияҳои металлии Ҷамъияти дорои масъулияти маҳдуди “Сохтмони Кабир”-ро ифтитоҳ намуданд.

Коргоҳи коркард ва истеҳсоли конструксияҳои металлӣ ба ифтихори 35-солагии Истиқлоли давлатии Ҷумҳурии Тоҷикистон дар доираи “Солҳои рушди саноат” – 2022-2026 аз тарафи соҳибкори ватанӣ Комил Турдибоев бунёд шудааст.

Бо таъсиси коргоҳи нав 20 нафар бо ҷои кори доимӣ ва маоши хуб таъмин гардиданд. Бо дарназардошти афзоиши талабот ба маҳсулоти коргоҳ ва сари вақт иҷро намудани фармоиш 10 нафари дигар ба кор ҷалб карда мешаванд.

Ба Президенти Ҷумҳурии Тоҷикистон муҳтарам Эмомалӣ Раҳмон иттилоъ дода шуд, ки металл ба коргоҳ аз дохил ва хориҷи мамлакат ворид гардида, раванди коркард ва истеҳсоли конструксияҳо тавассути хатҳои муосири технологӣ ба роҳ монда мешавад.

Дар коргоҳи навбунёд номгӯи зиёди конструксияҳои металлӣ, аз ҷумла гунбазҳо барои бинои иншооти гуногун, маҷмааҳои варзишӣ, терминалҳои мусофирбарӣ, истгоҳҳои роҳи оҳан, намоишгоҳҳо, пулҳо, роҳҳои пиёдагарди рӯизаминӣ ва амсоли ин бо шаклу андозаҳои зарурӣ бо сатҳу сифати баланд коркард ва истеҳсол мегардад.

Ба гуфти мутахассисон, конструксияҳои металлии коркард ва истеҳсоли коргоҳ дар асоси лоиҳаи иншооти сохташаванда бо фармоиши мизоҷон омода карда мешавад, ки муҳлати истифодаи тӯлонӣ доранд.

Дастгоҳу таҷҳизот барои коркарди металл ва истеҳсоли конструксияҳо аз Федератсияи Русия ва Ҷумҳурии Мардумии Чин дастрас гардидааст, ки онро мутахассисони тоҷик васлу насб намуда, идора менамоянд.

Бояд гуфт, ки коркард ва истеҳсоли конструксияҳои металлии аз 1 то 5-сантиметра чанд марҳила, нахуст буридан, баъдан башаклдарорӣ, кафшергарӣ, ҷамъу васлнамоӣ ва ниҳоят рангуборро дар бар мегирад.

Зимни шиносоӣ ба Пешвои миллат муҳтарам Эмомалӣ Раҳмон иттилоъ доданд, ки иқтидори истеҳсолии коргоҳ дар як сол ба ҳисоби миёна 400 тонна конструксияҳои металлии дорои сифати баланд мебошад.

Ҳоло дар мамлакат талабот ба конструксияҳо аз оҳан ҳамчун масолеҳи сохтмонӣ зиёд аст. Ҷамъияти дорои масъулияти маҳдуди “Сохтмони Кабир” аз зумраи аввалин коргоҳҳоест, ки дар шаҳри Хуҷанд ба коркард ва истеҳсоли конструксияҳои металлӣ ба фаъолият шуруъ намуд.

Аз ин рӯ, масъулони коргоҳи нави саноатӣ нақша доранд, ки бо истифодаи босамар аз иқтидорҳои мавҷуда то андозае талаботи бозори дохилиро бо ин навъи маҳсулоти ивазкунандаи воридот таъмин намоянд.

Имрӯзҳо конструксияҳои металлӣ ба ҷумҳурӣ асосан аз давлатҳои хориҷ бо нархи гарон ва масрафи зиёд ворид мегардад. Акнун, дар коргоҳи навбунёд конструксияҳои оҳанин бо шакл ва андозаҳои гуногун ҳам бо фармоиши мизоҷон ва ҳам вобаста ба талаботи бозор коркард ва истеҳсол карда мешавад.

Дар ҳамин ҷо, Пешвои миллат муҳтарам Эмомалӣ Раҳмон бо фаъолияти Ҷамъияти дорои масъулияти маҳдуди “Сохтмони Кабир”, ки дар шаҳру ноҳияҳои ҷумҳурӣ дар сохтмон ва бунёди иншооти таъйиноти гуногун, аз қабили сутунпояҳои Парчами миллӣ, Нишони давлатӣ, қалъаҳо ва коху маҷмааҳо саҳми назаррас дорад, шинос шуда, ба корҳои анҷомдодаи мутахассисони тоҷик баҳои баланд доданд.

Сарвари давлат муҳтарам Эмомалӣ Раҳмон барои фаъолияти босамари коргоҳ ва ҷиҳати тараққӣ додани соҳаи мазкур ба кормандон маслиҳату тавсияҳои судманд доданд.

Ба таъкиди Президенти мамлакат, шаҳри Хуҷанд барои рушди соҳаи соноат, хусусан коркард ва истеҳсоли масолеҳи баландсифати сохтмонӣ аз металл имконияти воқеӣ дорад.

Ифтитоҳи Коргоҳи коркард ва истеҳсоли конструксияҳои металлии ҶДММ “Сохтмони Кабир” дар шаҳри Хуҷанд 06.07.2023

Июль 6, 2023 09:58

Хабарҳои дигари ин бахш

Фармони Президенти Ҷумҳурии Тоҷикистон
Хиради омӯзгор ҷаҳлу хурофотро аз байн мебарад ва сарчашмаи комёбиҳо мегардад, — бардошт аз ҳамоиш дар вилояти Хатлон
Сарвазири мамлакат Қоҳир Расулзода дар ноҳияи Дӯстӣ бо рафти ҷамъоварии ҳосили пахта ва корҳои созандагӣ шинос гардид
Сарвари давлат Эмомалӣ Раҳмон дар Рӯзи дониш ва дарси сулҳ иштирок намуданд
Доир ба заминаҳо, таҳаввулот ва дурнамои Истиқлоли давлатӣ машварати илмӣ-назариявӣ баргузор шуд
Суханронии Президенти Ҷумҳурии Тоҷикистон, Пешвои миллат Эмомалӣ Раҳмон ба муносибати Рӯзи дониш ва Дарси сулҳ
Эмомалӣ Раҳмон: Дӯстӣ ва ҳамкории Тоҷикистону Чин дар сухан не, дар амал аст
Дар ноҳияи Рӯшон майдончаҳои варзишӣ ба истифода дода шуданд
Ба намояндагони касбу кори гуногуни вилояти Хатлон мукофотҳои давлатӣ тақдим карда шуд
Сарвазири Тоҷикистон Қоҳир Расулзода дар ноҳияи Хуросон бо корҳои ободонию созандагӣ шинос шуд
Шарҳи Амри Президенти Ҷумҳурии Тоҷикистон
Амри Президенти Ҷумҳурии Тоҷикистон