БАХШИДА БА 35-СОЛАГИИ ИСТИҚЛОЛИЯТИ ДАВЛАТӢ. Дар шаҳри Панҷакент 1000 иншоот бунёд карда мешавад

ДУШАНБЕ, 16.08.2023. /АМИТ «Ховар»/. Бахшида ба 35-солагии  Истиқлолияти давлатии Ҷумҳурии Тоҷикистон дар шаҳри Панҷакент бунёди 1000 иншоот пешбинӣ шуда, ҳоло дар ҳама минтақаҳои шаҳр сохтмони биноҳо босуръат идома дорад. Ҳоло дар шаҳр 24 ширкати сохтмонӣ ба бунёди хонаҳои баландошёна бо марказҳои тиҷорату хизматрасонӣ ва дигар иншооти таъйиноти иҷтимоӣ машғул мебошанд. Дар ин хусус АМИТ «Ховар» бо истинод ба Мақомоти иҷроияи ҳокимияти давлатии шаҳр хабар медиҳад.

Бояд гуфт, ки  саҳми бинокорон дар бунёди иншооти гуногун ва ободу зебо намудани шаҳри Панҷакент хеле назаррас мебошад.

Дар ин самт фаъолияти Корхонаи воҳиди давлатии «Хоҷагии манзилӣ-коммуналӣ»-и шаҳр назаррас буда, кормандони он пайваста ба тоза намудани кӯчаю маҳаллаҳои шаҳр машғул мебошанд.

Аз ҷониби роҳбарияти шаҳр ба масъулини корхона оид ба андешидани тадбирҳои амалӣ ҷиҳати беҳдошти фаъолият, аз ҷумла, ба хизматрасонии коммуналӣ фаро гирифтани ҳамаи субъектҳои хоҷагидор ва ба ин васила беҳтар намудани вазъи молиявии корхона, дар ҳолати хуби санитарӣ нигоҳ доштани роҳу кӯчаҳо, эътибори ҷиддӣ ба парвариши гулу ниҳолҳои канори роҳҳо, дастрас намудани қуттиҳои замонавии партов, таъмири хонаҳои истиқоматии дар ҳисоби корхона қарордошта ва дигар масъалаҳои муҳими шаҳрдорӣ супориш дода шуд.

АКС: Мақомоти иҷроияи ҳокимияти давлатии шаҳри Панҷакент