Дар Душанбе ҷаласаи васеи Шурои Кумитаи техникии Федератсияи футболи Тоҷикистон доир шуд

ДУШАНБЕ, 11.08.2023 /АМИТ «Ховар»/. 10 август дар шаҳри Душанбе ҷаласаи васеи Шурои Кумитаи техникии Федератсияи футболи Тоҷикистон (ФФТ) баргузор гардид, хабар медиҳад  шореҳи варзиши  АМИТ «Ховар»  бо истинод ба федератсияи мазкур. 

Дар вохӯрӣ директорони Лигаи футболи Тоҷикистон, Лигаи футзали Тоҷикистон, Лигаи футболи бонувон, мудирони раёсатҳои доварон ва нозирони Федератсияи футболи Тоҷикистон, дастаҳои миллӣ, маркетинг, инчунин намояндагони федератсия дар вилоятҳо ва сармураббиёни дастаи мунтахаби олимпӣ (U-23) Мубин Эргашев ва дастаи  мунтахаби футзал Пайрав Воҳидов оид ба корҳои анҷомдода дар шаш моҳи соли равон ҳисобот доданд.

Дар доираи ҷаласа ҳамчунин бо мутахассиси 55-солаи итолиёвӣ Марко Раҷини қарордоди ҳамкорӣ ба имзо расид. Ин коршинос ба ҳайси мушовири техникӣ оид ба таълими Федератсияи футболи Тоҷикистон фаъолият менамояд.

Хотиррасон мешавем, ки  дар ҷаласаи васеи Шурои Кумитаи техникии Федератсияи футболи Тоҷикистон, ки дар шакли муколамаи ошкоро баргузор шуд, иштирокчиён ҳамчунин нақшаҳои худро барои шашмоҳаи дуюми соли 2023 пешниҳод намуданд.

     АКС: Федератсияи футболи Тоҷикистон